Memleket basshysy Qasym-Jomart Toqaev Shymkent qalasynyń ákimi Murat Áıtenovti qabyldady, dep habarlady Aqorda saıty.

Áıtenov Toqaevqa bıylǵy 9 aı ishindegi Shymkent qalasynyń áleýmettik-ekonomıkalyq damýynyń negizgi kórsetkishteri týraly aqparat berdi.

Sondaı-aq ol qala ınfraqurylymynyń qalyptasýy, bólshek saýdanyń damý barysy, Jumyspen qamtý jol kartasy aıasynda qalada júzege asyrylyp jatqan jobalar jóninde baıandady.

Qala ákiminiń aıtýynsha, 226 jobaǵa 45,3 mıllıard teńge kóleminde qarjy bólinip, onyń 80 paıyzy ıgerildi.

Sonymen qatar Shymkent qalasy boıynsha koronavırýs pandemıasynyń yqtımal ekinshi tolqynyna qarsy birqatar daıyndyq sharalary qabyldanǵan.

Prezıdent qaladaǵy atqarylyp jatqan jumystarǵa oń baǵa berip, shaharǵa ınvestısıa tartý isin, qoljetimdi kóp qabatty turǵyn úı qurylysyn odan ári jandandyrýdy jáne jańa jumys oryndaryn kóptep ashýdy tapsyrdy.