Búgin Qazaqstannyń tuńǵysh prezıdenti Nursultan Nazarbaevtyń "Abaı amanaty" atty maqalasy jarıalandy.

Nazarbaev prezıdent retindegi ókilettigin toqtatý týraly sheshim qabyldamas buryn bolashaq el basqarar azamatqa qajet qaıratkerlik tájirıbe men taǵylym jaıyn oı tezine, kóńil bezbenine tartyp, asyqpaı, zer sala qaraǵanyn aıtty.

"Abaıdyń:

Bas basyna bı bolǵan óńkeı qıqym

Minekı, buzǵan joq pa eldiń sıqyn?

... Birlik joq, bereke jok, shyn peıil joq,

Sapyryldy baılyǵyń, baqqan jylqyń.

Basta mı, qolda malǵa talas qylǵan,

Kúsh synasqan kúndestik buzdy-aý shyrqyń, – degen ókinishin qaıtalamaý qajettigi taǵy aldymnan shyqty.

Qazaqstan táýelsizdiginiń alǵashqy kúnderinen bastap menimen birge jumys istegen Qasym-Jomart Toqaevtyń adal ári jaýapkershiligi joǵary azamat ekenin esepke almaǵanda, onyń eldegi ishki jaǵdaıdy saralap qana qoımaı, shyǵystyń da, batystyń da tilderin meńgergendigin, Birikken Ulttar Uıymy Bas hatshysynyń orynbasary qyzmetin atqarǵanyn, álemdik saıasattaǵy Qazaqstannyń ornyn baıyptaı alatyn dıplomattyq qyryn da eskerdim. Sondaı-aq, ózim aıryqsha mán berip kele jatqan el birligi máselesi men adamzattyq qundylyqtardy úılestirý qabiletine senim arttym" dep jazǵan elbasy maqalasynda.

Nazarbaev Q.Toqaevtyń Abaıdyń 175 jyldyq mereıtoıyn atap ótý týraly sheshimi "Bolashaqqa baǵdar: rýhanı jańǵyrý", "Uly dalanyń jeti qyry" baǵdarlamalyq maqalalarynda qoıylǵan maqsattardy júzege asyrýdyń zańdy jalǵasy jáne Abaı murasyn zaman suranystaryna saı qaıta zerdeleýdiń mańyzdylyǵyn bildiretinin atap ótti.