Kókshetaýdaǵy "Qazeksportastyq" AQ holdıńiniń ishki qaýipsizdik qyzmetkerleri kompanıa jalaqylaryn bermeı otyrǵanyn aıtyp shaǵyndy. Bul týraly kokshetau.asia habarlady.  ⠀

Shaǵymdanýshylardyń aıtýynsha, kompanıa olarǵa on mıllıon teńgege jýyq qaryz. Qyzmetkerler birneshe aıdan beri zeınetaqy jarnalary toqtap qalǵandyǵyn aıtady.

– Bul kompanıada 2014 jyldan beri jumys isteımin. Osy jyldyń qańtarynda bizdi aqysyz eńbek demalysyna jiberdi, sodan keıin karantın bastaldy. Birneshe aıdan keıin men qyzmetimniń qysqartylǵany týraly habarlama aldym. Kompanıanyń maǵan qaryzy  –  2,7 mıllıon teńge. 2019 jyldan bastap zeınetaqy jarnalary joq, biz nesıe ala almaımyz. Bulaı jalǵasa beretin bolsa, biz Aqordaǵa jetemiz, parlamentke júginemiz jáne prezıdent bizdi tyńdaıdy dep senemiz. Oınap jatqan joqpyz, meniń úsh balam bar, otbasymdy asyraýym kerek, – deıdi kompanıa qyzmetkerleriniń biri.

Qyzmetkerler ártúrli organdarǵa úndeý joldaǵanyn, biraq ázirge nátıje joq ekenin kúıinishpen aıtty. 

Jýrnalıser jaǵdaıdyń mán-jaıyn bilý úshin kompanıanyń qabyldaý bólimine habarlasqan. Tutqany kótergen hatshy qyz qyzmetkerlerdiń jalaqysynyń keshiktirilýi týraly aqparatty rastaǵan. Alaıda karantınge baılanysty basshylyqtan eshkim joq ekenin aıtqan. ⠀ ⠀