Qazaqstan, Tájikstan, Túrikmenstan jáne Ózbekstan respýblıkalary prezıdentteri Qyrǵyz Respýblıkasyndaǵy oqıǵa týraly birlesken málimdeme jasady. Bul týraly Aqorda saıty habarlady.
"Baýyrlas Qyrǵyz Respýblıkasynda bolyp jatqan oqıǵalar bizdi qatty alańdatyp otyr.
Biz ǵasyrlar boıy ajyramas dostyq, tatý kórshilik baılanystary myǵym, mádenı jáne rýhanı qundylyqtary ortaq jaqyn kórshi elder retinde Qyrǵyzstan halqyn osy qıyn kúnderde parasattylyq tanytýǵa, eldegi beıbitshilik pen turaqtylyqty qaıta qalpyna keltirýge shaqyramyz.
Qyrǵyzstannyń barlyq saıası partıalary men qoǵamdyq uıymdary beıbitshilik pen tynyshtyqty qamtamasyz etý úshin qajetti kúsh-jigerin biriktirip, týyndaǵan máselelerdi Konstıtýsıa men ulttyq zańnamany saqtaı otyryp sheshedi dep úmittenemiz.
Qyrǵyzstandaǵy tynyshtyq – óńirlik qaýipsizdik pen Ortalyq Azıadaǵy ornyqty damýdyń mańyzdy faktory.
Elderimizdiń ótken joly bir jáne bolashaǵy da ortaq. Ortalyq Azıa halyqtaryn keleshek urpaqtyń ıgiligi jolyndaǵy berik beıbitshilikke, kelisim men jasampazdyqqa umtylysy biriktiredi.
Memleketterimiz ortaq maqsatqa birige otyryp, saýda-ekonomıkalyq, ınvestısıalyq, kólik-kommýnıkasıalyq jáne mádenı-gýmanıtarlyq baılanystardy, shekaralyq jáne óńiraralyq is-qımyldardy kúsheıtý jónindegi aımaqtyq yntymaqtastyqty belsendi nyǵaıtýda.
Ortalyq Azıadaǵy yntymaqtastyqty odan ári jandandyrý maqsatynda biz Qyrǵyzstan halqynyń birlikke, beıbitshilikke, derbes damýǵa jáne órkendeýge degen umtylysyn únemi qoldaımyz" delingen málimdemede.
Oqı otyryńyz: Almazbek Atambaev mıtıńshilerdi basqaryp júr (foto)