Úı kepilde bolsa, zeınetaqy qorynyń esebinen tólep, kredıtti jabýǵa bolady. Bul týraly Eńbek jáne halyqty áleýmettik qorǵaý mınıstri Birjan Nurymbetov aıtty.  

– Árıne, bolady. Bul jerde kez-kelgen úı ıpotekaǵa, kredıtke alynsa ol kepilde turmaı ma?! Kepilde sizdiń menshigińizdegi múligińiz turady. Sondyqtan tolyǵymen sol úıge qatysty ıpotekany jabýǵa zeınetaqy qoryndaǵy jarnalardy paıdalanýǵa bolady, – dedi Nurymbetov onlaın brıfıńte.

Sondaı-aq ol koronavırýs indetiniń ekinshi tolqynyna baılanysty elde qatań karantın jarıalanatyn bolsa, úkimet jumyssyz qalǵan qazaqstandyqtarǵa áleýmettik qoldaý kórsetetinin atap aıtty.

– Buǵan deıin meniń áriptesim – densaýlyq saqtaý mınıstri epıdemıologıalyq jaǵdaıǵa qatysty birneshe senarı usynǵanyn bilesizder. Biraq qazir ol boljamdardyń qaısysy bolatynyn bilmeımiz. Eger sol senarılerdiń bireýi oryn alyp jatsa, árıne, úkimet tarapynan mindetti túrde ekonomıkany, bıznesti, halyqty qoldaý sharalary qabyldanady, – dedi mınıstr.