COVID-19-ǵa qarsy kúreste qaza tapqan barlyq 182 medısına qyzmetkeriniń týystary Memlekettik áleýmettik saqtandyrý qorynan (budan ári-MÁSQ) 10 mln teńge mólsherinde birjolǵy tólem aldy. Budan basqa, COVID-19-ben kúresýge tartylǵan 5,3 myńnan astam medısına qyzmetkeri koronavırýs ınfeksıasy men  vırýstyq pnevmonıany juqtyrýyna baılanysty MÁSQ-dan birjolǵy áleýmettik tólem aldy. Bul týraly densaýlyq saqtaý mınıstrligi habarlady.

Budan buryn habarlanǵandaı, joǵaryda atalǵan tólem tólenetin medısına qyzmetkerlerin óńirlerdiń jáne respýblıkalyq mańyzy bar qalalardyń densaýlyq saqtaý basqarmalary janyndaǵy arnaıy komısıalar aýyrǵan medısına qyzmetkerlerin tekserý nátıjeleri negizinde anyqtaıdy. Ótinimderdi jınaqtaýdy QR Densaýlyq saqtaý mınıstrligi júzege asyrady, odan keıin ótinimder elektrondyq is maketterin qalyptastyrý úshin «Azamattarǵa arnalǵan úkimet» memlekettik korporasıasy» KEAQ-qa beriledi, sodan soń tólem taǵaıyndaý úshin MÁSQ-ǵa jiberiledi.

12 qazan saǵat 18.00-degi jaǵdaı boıynsha MÁSQ COVID-19 nemese vırýstyq pnevmonıa juqtyrǵan 5 334 medısına qyzmetkeriniń ótinishi boıynsha jáne aýrýdyń saldarynan qaıtys bolǵan 182 medısına qyzmetkerine qatysty aqshalaı qarajatty taǵaıyndaý men tóleýdi júzege asyrdy.Osylaısha, tólemderdi COVID-19-ben kúreste qaıtys bolǵan barlyq medısına qyzmetkerleriniń týystary aldy.

Óńirler bólinisinde medısına qyzmetkerlerine COVID-19 nemese vırýstyq pnevmonıany juqtyrý jaǵdaıyna tólemderdiń eń kóp sany Nur-Sultan (1027) jáne Almaty (560) qalalary jáne Shyǵys Qazaqstan (480), Atyraý (465) jáne Qaraǵandy (409) oblystary boıynsha júrgizildi.

Esterińizge sala keteıik, QR Eńbek jáne halyqty áleýmettik qorǵaý mınıstri men QR Densaýlyq saqtaý mınıstriniń 9 sáýirdegi «Densaýlyq saqtaý uıymdarynyń COVID-19 koronavırýstyq ınfeksıasyna qarsy kúres jónindegi epıdemıaǵa qarsy is-sharalarǵa tartylǵan qyzmetkerleri atalǵan ınfeksıany juqtyrǵan nemese odan qaıtys bolǵan jaǵdaıda olarǵa birjolǵy áleýmettik tólemdi júzege asyrý qaǵıdalaryn bekitý týraly» birlesken buıryǵyna aǵymdaǵy jyldyń 22 shildesinde engizilgen ózgeristerge sáıkes, joǵaryda kórsetilgen tólem:

– koronavırýstyq ınfeksıa nemese vırýstyq pnevmonıa juqtyrǵan medısına qyzmetkerlerine – 2 mln teńge;

– COVID-19 koronavırýstyq ınfeksıasyn juqtyrǵannan,  vırýstyq pnevmonıamen aýyryp qaıtys bolǵan jaǵdaıda olardyń otbasyna – 10 mln teńge kóleminde tólenedi.