«Nur Otan» partıasy Tóraǵasynyń birinshi orynbasary Baýyrjan Baıbektiń Qostanaı oblysyna jumys sapary jalǵasýda. Sapar barysynda ol qoǵam belsendilerimen jáne praımerız qatysýshylarymen kezdesip, «Nur Otan» partıasynyń taıaýdaǵy 5 jylǵa arnalǵan óńirlik saılaýaldy baǵdarlamasynyń jobasyn talqylady.

«Elbasy, partıa Lıderi N.Á.Nazarbaevtyń tapsyrmasymen partıaishilik saılaý ótkizý kezinde elimiz boıynsha azamattardan 20 myńnan astam usynys jınaldy. Olardyń myńnan astamy Qostanaı oblysynyń turǵyndarynan tústi.

Taldaý kórsetkendeı, adamdar negizinen aýyl ishindegi joldardyń sapasy, sýmen jáne gazben qamtý, turǵyn úı men bilim berý nysandaryn salý, aýyldyq mektepterde kompúter tehnıkalaryn jańartý máselelerin kóterýde. Turǵyndardyń aýyldaǵy ınternettiń jyldamdyǵyna da kóńilderi tolmaı otyr. Kóterilip otyrǵan máselelerdiń ózektiligin eskerip, olardy oblystyq saılaýaldy baǵdarlamaǵa mindetti túrde qosý qajettigi jaıynda pikirimdi aıttym.

Óńir halqynyń úshten biri aýyldyq jerde turatyndyqtan, partıanyń Qostanaı oblysy boıynsha saılaýaldy baǵdarlamasy aýyl sharýashylyǵyn aıtarlyqtaı qoldaý sharalaryn kózdeıdi. Atap aıtqanda, taıaýdaǵy 5 jylda oblysta egis alqaptarynyń qurylymyn ártaraptandyrýdy qamtamasyz etý, jańa sýarmaly jerlerdi aınalymǵa engizý, tehnıkany jańartý, sondaı-aq óńdeýshi aýyl sharýashylyq kásiporyndaryn iske qosý jáne jańǵyrtý josparlanýda.

Memleket basshysy Q.K. Toqaev el halqyna Joldaýynda damyǵan aýyl sharýashylyǵynsyz básekege qabiletti ekonomıka qurý múmkin emestigin atap ótti. Osyǵan baılanysty óńirdi tabıǵı sútpen jáne joǵary sapaly ashytqan sút ónimderimen qamtamasyz etip otyrǵan «Olja Sadchıkovskoe» aýyl sharýashylyǵy kásipornynyń qyzmetimen tanystym. Bul kásiporyn – 320 adamdy turaqty jumys ornymen qamtamasyz etip otyrǵan óńirdegi damyǵan joǵary tehnologıaly óndirýshilerdiń biri», - dep jazdy Baýyrjan Baıbek Facebook jelisindegi paraqshasynda.

Partıa Tóraǵasynyń birinshi orynbasary kásiporyn qyzmetkerlerimen suhbattasyp, olardyń birqatar ótinishin baqylaýǵa aldy. Mysaly, Sadchıkovka aýylynyń turǵyny Tamara Kısıleva osy eldimekendegi jalpy uzyndyǵy 6 km bolatyn eki ortalyq kóshege jóndeý júrgizýdi ótindi. Bul kóshelerdiń boıynda 1350-deı turǵyn bar.

Jumys saparynyń sońynda Baýyrjan Baıbek Qostanaı qalasyndaǵy jańa modýldi ınfeksıalyq aýrýhanamen tanysty. Óńirdiń medısına qyzmetkerlerimen birge densaýlyq saqtaý uıymdarynyń koronavırýs pandemıasynyń týyndaýy múmkin ekinshi tolqynyna daıyndyǵy jaıyn talqylady