Elimizdiń birneshe óńirinde azyq-túliktiń baǵasy kóterile bastady. Ásirese halyq kóp tutynatyn taýarlardyń quny rekordtyq kórsetkishpen ósýde. Bul týraly «Qamshy» portaly KTK arnasyna silteme jasaı otyryp habarlaıdy.

Qymbatshylyq, ásirese Petropavl, Qostanaı jáne Taraz qalalarynda qatty sezilip jatyr. Onyń ústine keıbir azyq túrleri tipti dúkenderde joq. Ár aımaqta baǵany turaqtandyrý úshin arnaıy shtab qurylǵanymen, kásipkerler ákimshiliktiń ámirine kónetin emes.

Petropavlda dúken sórelerinen úsh kún boıy joǵalyp ketken qant tek 25 tamyzda ǵana paıda boldy. Biraq baǵasy aspandap, turǵyndardyń qaltasyna salmaq salýda. Kelisi 160 teńgeden satylǵan sheker 200 teńgege sharyqtap ketken. Suıyq maı men et qunynyń kóterilýi de turǵyndardyń yzasyn týǵyzýda.Tipti, irimshiktiń bastapqy quny 650 teńgeni qurasa, devalvasıadan soń 900-ge jetken.

Qostanaıda da azyq-túliktiń baǵasy myń qubylyp tur. Reseıden tasymaldanatyn ónim 5-10 teńgege kóterilse, ımporttyq taýar quny 20 paıyzǵa sharyqtaǵan. Bul jaǵdaı jurtqa qatty sezilip jatqan joq. Sebebi ázirge qordaǵy taýar saýdaǵa shyǵýda. Endi jańa ónim túskende qymbatshylyq bolýy bek múmkin. Biraq bul dúrbeleńdi sheneýnikter baıqamaıtyn tárizdi.

Jambyl oblysynyń jurty endi qantpen múldep qosh aıtysýy yqtımal. Aımaqtaǵy kóterme saýda oryndarynda qant atymen joq. Keı jerlerde bolǵan kúnniń ózinde quny tym qymbat. Buǵan deıin 3500 teńgege satylǵan bir qap sheker, 4500-ge bir-aq jetti.

Saýdagerler Tarazdaǵy qant zaýyty jumysyn toqtatty degen ýáj aıtýda. Sol sebepti deldal fırmalar taýar jetkizbeı jatsa kerek. Alaıda sheker shyǵaratyn óndiris basshylyǵy ónim tapshy degen beker dep otyr. Ár óńirde, baǵany baqylaý úshin arnaıy shtab qurylǵan. Biraq ázirge onyń jurtqa paıdasy shamaly.

Gúlden Ábdibaqyt