Áıgili akter Leonardo Dı Kaprıo Instagram jelisinde Aral teńiziniń jaǵdaıyna alańdaýshylyq bildirdi. Bul týraly "Qamshy" aqparattyq portaly tengrinews.kz-ke silteme jasaı otyryp habarlaıdy.
"Metaforamen sóıleıtin bolsam, túıeler Aral teńiziniń sýynyń ústinde, qurǵap qalǵan bederden ótip bara jatyr. Sýarý maqsatynda sýdy burý teńizdiń kólemin kishireıtti, sóıtip, bir kezderi keremet shyǵanaq bolǵan jerde keme qırandylarynyń molasy paıda boldy", - dep jazdy Leonardo Dı Kaprıo.
Keıin ol burynǵy keńes respýblıkalaryndaǵy tabıǵatty lastaýdyń saldary jaıly, onyń ishinde Chernobyl apaty týraly sýretterdi www.gerdludwig.com saıtynan kórýge bolatynyn aıtty. Sýretke 40 myńǵa taıaý laık qoıylyp, 400-ge jýyq pikir jazylǵan.
Aıta keteıik, akterdiń Instagram jelisindegi resmı paraqshasynajazylǵandar sany mıllıonnan asyp jyǵylady.
Sýrettiń avtory sońǵy kezde shyǵarmashylyǵymen Qazaqstan jerinde aınalysyp júrgen fotograf - Gerd Lúdvıg (Gerd Ludwig). Ol National Geographic telearnasynyń fotografy. Osyǵan deıin bul fotograftyń Qazaqstanda túsirgen sýretteri Internette qyzý talqyǵa salynyp júr. Máselen, Natgeo akkaýnty osyǵan deıin Almatynyń sýretin jarıalaǵan bolatyn. Sýrette jolaýshylary kóp eski avtobýs pen onyń kondýktory beınelengen edi. Bir kún ishinde Instagram jelisindegi avtobýs sýretiniń astynda narazy mándegi pikirler kóptep jazyldy - 2500-den astam pikir. Qoldanýshylar telearnanyń Almatynyń jaman jaǵynan kórsetken sýretin jarıalaǵany úshin narazy boldy. Keıin Natgeo akkaýnty Astananyń ásem sýretin jarıa etti.
Ábdibaqyt Gúlden
"Qamshy" siltedi
