Qytaıda alǵash ret COVID-19 tiri vırýsy muzdatylǵan teńiz ónimderiniń qaptamasynan tabyldy. Bul týraly Qytaıdyń aýrýlardy baqylaý jáne aldyn alý ortalyǵy málimdedi, dep habarlady RIA Novostı.

Sındaodaǵy koronavırýs ınfeksıasyn jańadan juqtyrǵandardy zertteý barysynda ortalyq sarapshylary ımporttalǵan muzdatylǵan treskanyń syrtqy qaptamasyna jasalǵan synamadan tiri vırýs tabylǵan.

Vedomstvo zerthanadan tys jerde muzdatylǵan ónimderdi tasymaldaý kezinde COVID-19 qaptamada uzaq ýaqyt ómir súre alatyny dáleldengenin túsindirdi.

Tiri vırýs bar ónimmen qorǵanyssyz baılanys ornatqanda ınfeksıa juqtyrý qaýpi bar. Biraq mundaı yqtımaldyq óte tómen dep baǵalanady.

– Qazirgi ýaqytta qol jetimdi zertteýler COVID-19 tamaq arqyly beriletin indet emes ekendin aıtady. Búgingi kúnge deıin vırýs tabylǵan muzdatylǵan teńiz ónimderimen baılanys arqyly ınfeksıa jaǵdaılary da anyqtalǵan joq, – dep atap ótti ortalyqtaǵylar.

Aýrýlardyń aldyn alý ortalyǵy qaýip tobyndaǵy qyzmetkerlerge muzdatylǵan ónimdermen baılanysta jeke qorǵanys sharalaryn arttyrýdy usyndy.