Ázerbaıjan qorǵanys mınıstrligi Armenıa qarýly kúshterin beıbit turǵyndar turatyn aýdandarǵa úsh balıstıkalyq zymyran jiberdi dep aıyptady.

"Armenıa qarýly qúshteri shamamen 07:00-de Sıazan aýdany baǵytynda 3 zymyran, shamamen 09:00-de Gabala aýdany boıynsha eki zymyran jáne Kúrdamır aýdany boıynsha bir zymyran ushyrdy.

Armenıa qarýly kúshteri beıbit turǵyndar men azamattyq ınfraqurylymdy kózdegen" delingen Ázerbaıjan qorǵanys mınıstrligi taratqan habarlamada.

Bul aqparatty Armenıa qorǵanys mınıstrliginiń resmı ókili joqqa shyǵardy. 

"Bul málimdeme Ázerbaıjannyń taǵy bir arandatýy, olar Armenıany soǵys qımyldaryna tartýdy maqsat etip otyr" delingen resmı ókil Arsrýn Ovannısánnyń habarlamasynda.

Taýly Karabahtaǵy jaǵdaı 27 qyrkúıekte shıelenise túsken edi. Aımaqta eki ret atysty toqtatý týraly kelisimge qol jetkizilgenine qaramastan, Armenıa jáne Ázerbaıjan qarýly kúshteri arasyndaǵy qaqtyǵys aýyq-aýyq qaıtalanyp jatyr.