Búgin Májilis Spıkeri Nurlan Nyǵmatýlınniń tóraǵalymen jalpy otyrys ótti. Onda depýtattar Ekologıalyq Kodekstiń jobasyn birinshi oqylymda maquldady, dep habarlady májilistiń baspasóz qyzmeti. 

Ol qorshaǵan ortany qorǵaý salasynda memlekettik retteý men basqarýdyń neǵurlym tıimdi jáne aıqyn júıesin qurýǵa baǵyttalǵan.

Kodeks jobasy boıynsha baıandama jasaǵan Ekologıa, geologıa jáne tabıǵı resýrstar mınıstri  Maǵzum Myrzaǵalıevke depýtattar birqatar suraqtar qoıyp, pikirlerin bildirdi.

Osy rette, Májilis Tóraǵasy Nurlan Nyǵmatýlın atalǵan Kodeks jobasy boıynsha:

Máselen, Qaraǵandy oblysynyń Ulytaý aýdanynyń turǵynynyń 5-10 taýyǵy bar delik. Ony deklarasıalaý úshin ol oblystyq tabıǵı resýrstar basqarmasyna barýy kerek. Al ol oblys ortalyǵynda ornalasqan. Iaǵnı, ol tipti 5 emes, tipti 1 taýyǵyn deklarasıalaý úshin 700 shaqyrymdy júrýi kerek. Kodekste osylaı jazylǵan. Nelikten olaı? Siz kodekste «100 jáne odan tómen bas úshin» dep jazasyz. Oǵan, ıaǵnı, mal bolsyn, qus bolsyn kiredi. Ol sanǵa 99 maldy da, 1 maldy da kirgizýge bolady. Álbette bir tabynnyń bir taýyqqa qaraǵanda ekologıaǵa tıgizetin áseri mol ekenin aldymen túsinip alý kerek, - deı kelip:

Zań jobasynyń osyndaı normasyn oqyǵan kezde oılaısyń, bul normany jazǵan adam aýylda boldy ma, bolmaǵan shyǵar? Shirkin, osy normany jazǵan mamandy eki-úsh aıǵa aýylǵa jiberse ǵoı. Sonda taýyq pen sıyrdyń aıyrmashylyǵyn túsinetin bolar, - dedi Nurlan Nyǵmatýlın.

Osy másele boıynsha  jalpy otyrys barysynda oǵan ilespe zań jobasy da talqylandy. Depýtat Taras Hıtýov Ulttyq ekonomıka mınıstrligine ekologıalyq tólemderdiń elimiz óńirleriniń jergilikti ekologıalyq qajettilikterine júz paıyz baǵyttalýy týraly normalar bar ekenin aıtyp, suraǵyn qoıdy. Sonymen qatar, bul qarajattyń jumsalý tártibi men nysanaly maqsaty kózdelmegenin jetkizdi.

Sondyqtan depýtattar ekologıalyq tólemderdiń jergilikti búdjetke túsip, qorshaǵan ortany qorǵaý jónindegi is-sharalarǵa ǵana baǵyttalýy úshin túzetýler usyndy.

Osy rette, Nurlan Nyǵmatýlın bul normanyń óte mańyzdy ekenin alǵa tarta kelip:

Kóp bolsa da, az bolsa da, ekologıalyq tólemder jergilikti búdjetke túsedi. Odan keıin - ol aqsha qaıda, qandaı maqsatqa jumsalady, ony bir Qudaı biledi.Jasyratyny joq, sol aqsha ekologıadan basqa da sharalarǵa jumsalatyn jaǵdaılar bolady. Endi osy Zań jobasyna sáıkes, ekologıalyq tólemder tek ǵana qorshaǵan ortany qorǵaý sharalaryna jumsalatyn bolady. Túsken aqshanyń 100 paıyzy. Bul óte durys, óte qajetti dep oılaımyn. Sondyqtan, bul normany qoldaý kerek, - dedi.

Osyǵan sáıkes, Nurlan Nyǵmatýlınniń aıtýynsha, jalpy Ekologıalyq Kodeks  Májilis maquldaǵan zań jobalary qataryna taǵy bir óte mańyzdy qujat.  Bul Kodeks  boıynsha depýtattar jyldyń basynan beri  kóptegen otyrystar, talqylaýlar ótkizgen. Zań jobasyn talqylaýǵa depýtattarmen qatar, osy saladaǵy kásibı mamandar, sarapshylar, iri ónerkásip ókilderi jáne qoǵam belsendileri qatysty. Osy ózekti máseleni qorytyndylaý barysynda:

Ózderińizge belgili, Memleket Basshysy Qasym-Jomart Kemeluly Toqaev Ekologıalyq Kodeksti jyl sońyna deıin qabyldaý týraly naqty tapsyrma bergen bolatyn. Osyǵan oraı, depýtattar osy saladaǵy problemalardy sheshýge, sonymen birge, ekologıany taza ustaýǵa, qorǵaýǵa, jáne tabıǵı baılyqtardy saqtaýǵa qatysty mańyzdy normalardy
engizdi - dep, jańa Kodeks - zamanǵa saı tehnologıalardy paıdalana otyryp, elimizdiń ekologıalyq jaǵdaıyn jaqsartýǵa arnalǵan naqty qadam ekenin atap ótti.