Almaty oblysynda karantın sharalary kúsheıtiledi, dep habarlady zakon.kz saıty.

Saıt málimetinshe, Almaty oblysynyń bas memlekettik sanıtar dárigeri E.Sydymanov 28 qazandaǵy "Almaty oblysynyń aýmaǵynda karantın rejımi jáne keıbir shekteý sharalaryn engizý týraly" qaýlysyna qol qoıdy. Qaýly boıynsha 29 qazannan bastap óńirde tamaqtaný oryndarynda adam qabyldaý 50-den 30-ǵa deıin qysqartylady; 30-dan asa adam qabyldaıtyn meıramhana, kafe men asqanalar jabylady.

Aldyndaǵy qaýlyda bir ústelde 4-6 adamnan astam otyrýǵa tyıym salynady delinse, endi 4-ten asyrmaý jaıy naqtylandy. Tamaqtaný oryndarynyń jumys kestesi ózgerissiz qaldyryldy: saǵat 9-00-den 22-00-ge deıin. Biraq jańa qaýlyda olarǵa tek jumys kúnderi jumys isteýge ruqsat berilgen. Al demalys kúnderi tek úıge tamaq jetkizý qyzmeti túrinde ǵana jumys isteı alady.

Odan bólek mektepke deıingi barlyq uıymdardyń jumysyna tyıym salyndy (tek 15 bala qabyldaǵan kezekshi toptar jumys isteıdi).

Ornalasqan ornyna qaramastan, barlyq baseınder jabylady.

Sport nysandarynda da kisi qabyldaý 50-den 30 paıyzǵa qysqartyldy. Ulttyq quramaǵa jattyǵý ótkizýge ruqsat beriledi. Sondaı-aq kórermenderdiń qatysýynsyz olımpıada men el birinshilikterin de ótkizýge ruqsat.

Demalys jáne mereke kúnderi barlyq saýda úıleri men saýda, oıyn-saýyq ortalyqtary jabylady. Bul nysandaǵy azyq-túlik jáne dárihana bólimderi ǵana jumys isteıdi.

Memlekettik qyzmet pen kásipkerlik sala basshylyǵy jumysshylarynyń 50-60 paıyzyn qashyqtan jumys isteýge kóshirýge mindetti.