Búgin Almatyda Qazaqstan Respýblıkasynyń Prezıdenti Q. K. Toqaevtyń atynan «Halyq alǵysy» medalimen qalanyń jáne eldiń koronavırýs pandemıasymen kúres jónindegi jalpy jumysyna belsendi qatysqan medısına qyzmetkerleri, eriktiler, qoǵam ókilderi men buqaralyq aqparat quraldarynyń ókilderi marapattaldy.

«Halyq alǵysy» medali Memleket basshysynyń Jarlyǵymen pandemıamen kúreste erekshe kózge túsken azamattardy kótermeleý maqsatynda arnaıy taǵaıyndalǵan.

Almatyda «Halyq alǵysy» medalimen 275 adamnyń úlesi atap ótildi, olardyń 70%-y densaýlyq saqtaý júıesiniń qyzmetkerleri: dáriger-reanımatologtar, ınfeksıonıster, medbıkeler, feldsherler jáne jedel medısınalyq járdem júrgizýshileri, dezınfektorlar, sanıtarıalyq qyzmetkerler jáne t. b. Ońtústik astanada barlyǵy 18 myńnan astam medısına qyzmetkeri jumys isteıdi.
Almaty qalasy ákiminiń orynbasary Erjan Babaqumarov marapattardy tabystaı otyryp, qala jáne ákimdik atynan qaısarlyǵy, kásibıligi, belsendi azamattyq ustanymy úshin alǵysyn bildirdi.

«Memleket basshysy Sizderdiń eńbekterińizdi erekshe atap ótti, oǵan dálel osy halyqtyń rızashylyǵyn bildiretin „Halyq alǵysy“ marapaty. Sizderdiń pandemıamen kúreske qosqan eńbekterińiz óte zor», — dedi E. Babaqumarov.

Ol budan keıingi jumysta da birlik pen yntymaqtastyqtyń mańyzdylyǵyn atap ótti.

Eriktiler, qoǵam belsendileri men jýrnalıserge arnap jeke alǵys sózder aıtyldy. Pandemıa kezinde qala turǵyndaryna myńdaǵan eriktiler kómek kórsetti. Olar 80 myńnan astam azyq-túlik jıyntyǵyn tasymaldady. Eriktiler dárigerlerge basqa elderden kelgen azamattardy ornalastyrýǵa kómektesti, epıdemıalyq talaptardyń saqtalýyn qamtamasyz etý maqsatynda qoǵamdyq monıtorıń júrgizdi, qalanyń áleýmettik qyzmetteriniń jumysyna yqpal etti, sondaı-aq turǵyndar arasynda túsindirý jumystaryn júrgizdi.

Qala turǵyndaryn pandemıamen jalpy kúreste qabyldanyp jatqan sharalar týraly jedel habardar etýdi qamtamasyz etý maqsatynda Almaty qalasynyń ákimdigi BAQ ókilderimen biryńǵaı chat qurdy. Elimizdiń jáne megapolıstiń 100-den astam negizgi jýrnalıseri táýlik boıy halyqqa pandemıanyń taralýyn boldyrmaý úshin qajetti barlyq mańyzdy sheshimder men sharalardy: aldyn alý sharalaryn saqtaýdyń mańyzdylyǵy men qajettiligi, shekteý is-sharalarynyń qoldanylýy jáne t. b. jetkizip otyrady.

Marapattaý rásimi barlyq sanıtarlyq-epıdemıalyq talaptardy, onyń ishinde áleýmettik qashyqtyq pen maska rejımin qatań saqtaı otyryp, ashyq aýada ótkenin atap ótken jón.