«Nur Otan» máslıhattar men Májiliske partıalyq tizimderdi anyqtaıtyn konferensıalar ótkizý jónindegi nusqaýlyqty ázirledi.

«Nur Otan» partıasynyń Ortalyq apparaty partıa fılıaldary konferensıalarynyń árbir kezeńin reglamentteıtin nusqaýlyqty bekitti, onyń barysynda barlyq deńgeıdegi máslıhattarǵa partıalyq tizimder jáne Májiliske partıalyq tizimge ár óńirden kandıdattar anyqtalatyn bolady.

Sonymen, partıaishilik irikteý – praımerızdiń ekinshi deńgeıi aıasynda kandıdattardy konferensıalarda pikirsaıystar kútýde.

Májiliske úmitkerler, respýblıkalyq mańyzy bar qalalardy qospaǵanda, eki ret – aýdandyq jáne oblystyq konferensıalarda pikirsaıysqa túsedi.

Parlamenttiń tómengi palatasynyń qyzmettegi depýtattary birden oblystyq sondaı-aq respýblıkalyq mańyzy bar qalalar konferensıalaryndaǵy pikirsaıystarǵa qatysa alady.

Partıanyń nurotan.kz resmı saıtynda jáne primaries.kz saıtynda jarıalanǵan nusqaýlyqqa sáıkes koronavırýs pandemıasyn eskere otyryp, aýdandyq, qalalyq jáne aımaqtyq partıalyq konferensıalar áleýmettik araqashyqtyq qamtamasyz etilgen úı-jaılarda, sondaı-aq barlyq sanıtarlyq-epıdemıologıalyq normalar saqtala otyryp ótkizilýi kerek.

Nusqaýlyqqa sáıkes aýmaqtyq partıa konferensıasyna delegattardy bastaýysh partıa uıymynyń jınalysy saılaıdy. Praımerızge qatysqan kandıdattar jáne olardyń senimdi ókilderi konferensıaǵa delegat retinde saılanbaıdy.

Eń joǵary reıtıńke ıe bolǵan kandıdattar arasynan aýmaqtyq partıa konferensıasyna pikirsaıysqa qatysýshylardyń tizimin fılıaldyń Saıası keńesiniń Búrosy bekitedi.

Konferensıalarda daýys berý «Praımerız» aqparattyq júıesinde ótkiziletin pikirsaıystardyń qorytyndylary boıynsha daýys berýdi qospaǵanda, delegattyń qol nemese mandatyn kóterýi arqyly ótkiziledi.

Ashyqtyqty qamtamasyz etý úshin barlyq pikirsaıys áleýmettik jelilerde tikeleı efırde kórsetiletinin atap ótken jón.

Pikirsaıys qorytyndysy boıynsha eń kóp daýys jınaǵan kandıdat Májilistiń partıalyq tizimine pikirsaıysqa qatysýshy retinde oblystyq konferensıaǵa usynylady. Árbir aýdan, qala Májilistiń partıalyq tizimine pikirsaıysqa bir qatysýshyny usynady. Oblys ortalyǵy Májilistiń partıalyq tizimindegi óńirdiń ókildik kvotasyna teń sanda pikirsaıysqa qatysýshylardy usynady.

Oblystyq máslıhattarǵa partıalyq tizimder tıisti konferensıalarda bekitiletin bolsa, al Májiliske qorytyndy tizim «Nur Otan» sezinde bekitiledi.

Eske sala keteıik, praımerız – Elbasy, «Nur Otan» partıasynyń Lıderi Nursultan Nazarbaevtyń bastamasymen qolǵa alynǵan «Senim. Dıalog. Bolashaqqa nyq qadam» partıany «qaıta jandandyrý» baǵdarlamasynyń qorytyndy kezeńderiniń biri.

Praımerızge 10 myńǵa jýyq kandıdat qatysty. Olardyń 37%-ti – áıelder, 29%-ti – 35 jasqa deıingi jastar. Bastaýysh partıa uıymdarynan kandıdattardyń 30%-i usynylsa, al 70%-i - ózin-ózi usynýshylar. Kandıdattardyń ortasha jasy – 43 jas. Bul rette partıaishilik saılaýdyń birinshi deńgeıindegi daýys berýge 662 687 partıalyq qatysty.