"Asyl arna" telearnasy jabylyp, 2021 jyly "Tálim tv" arnasy ashylady. Bul týraly jańa jáne eski arnanyń dırektory Muhammedjan Tazabek ortalyq komýnıkasıalar qyzmetinde málimdedi.

Ol  halyq eki arnaǵa alańdap qalmas úshin dinı akkaýnttardyń barlyǵyn "Halyq arnaǵa" tapsyratynyn aıtty.

– Biz kútken tarıhı sát te keldi. Búgin sonyń kýási bolyp otyrmyz. Sebebi din degen úlken amanat, óte názik jáne kúrmeýi qıyn máselelerdiń basyn quraǵan aýqymdy sala. "Shymshyq soısa da qasapshy soısyn" degendeı, sol salanyń mamandary tikeleı osy sharýamen atsalysýyna árdaıym tilektes bolyp keldik. "Asyl arna" bylaı da jumys jasap tura berýine bolar edi. Oǵan eshqandaı kedergi nemese oǵan eshqandaı bir ótinish bolǵan joq. Biraq men óz tarapymnan jurt aqparatty bir ǵana bulaqtan alsyn, alańdamasyn, eki arnaǵa alańdap, enshisin shashyp almasyn, bir jerden bolsyn dep, dinı akkaýnttardyń barlyǵyn "Halyq arnaǵa" tapsyramyn dep sheshim qabyldadym, – dedi ol.

Áleýmettik jeliler men aqparat quraldarynda dinı ustanymyna qatysty aıtylyp júrgen áńgimelerdiń negizsiz ekenin jetkizdi.

– Ár adamnyń jeke kózqarasy bolady. Ótkende facebook jelisinde, aqparattyq bulaq kózderinde aıtyp júrgenimdeı, qaı kezden dinı ustanym QMDB ustanymymen birdeı. Kóp jaǵdaıda aqparat salasynda ártúrli áńgime aıtylady. Keıin ol tekserilmegen halde senimen ortaqtasyp birazǵa deıin júredi. Osy kúnge deıin de sálafı nemese basqa baǵytta degenge úlken bir dáıek, fakt joq. Kerisinshe QMDB-men birlese atqarǵan jobalarym, jumystarym aqparattyń ashyq kózderinde tur. Ǵulamalar keńesinde de ártúrli qańqý sózderge jol qalmaý úshin aqparat bir jerden ashyq tarqaýy úshin kózqarasymdy baıandadym. QMDB-men bir baǵytta, bir sharıǵatta kele jatyrmyn. Mende basqa baǵyt, basqa kózqaras joq, – dedi M.Tazabek onlaın brıfıńte.