Qazaqstan prezıdenti Qasym-Jomart Toqaev Ózbekstan prezıdenti Shavkat Mırzıóevpen telefon arqyly sóılesti, dep habarlady Aqordanyń resmı saıty.

Qazaqstan men Ózbekstan prezıdentteri ártúrli salalardaǵy ekijaqty yntymaqtastyqtyń damýyna qanaǵattanatyndaryn aıtqan. Áńgimelesý barysynda jaqyn jyldary atqarylatyn birlesken jobalar talqylanǵan.

"Memleket basshylary Ortalyq Azıadaǵy ahýaldy talqylaý kezinde óńirdegi turaqtylyq pen qaýipsizdikti qamtamasyz etýde birlesip jumys isteýge ýaǵdalasty. Qazaqstan men Ózbekstan qyrǵyz halqyna ekonomıkalyq jáne gýmanıtarlyq kómek kórsetedi.

Sonymen qatar, Qasym-Jomart Toqaev pen Shavkat Mırzıóev 10 qarasha kúni Reseıdiń tóraǵalyǵymen ótken Shanhaı yntymaqtastyq uıymy samıtiniń nátıjelerin joǵary baǵalady" delingen aqparattyq habarlamada.