Túriktiń "Galatasaraı" komandasynyń nemis shabýylshysy Lýkas Podolskı Chempıondar lıgasynyń jerebesinen keıin Twitter jelisinde Qazaqstan týraly jazba jazǵan edi, bul týraly "Qamshy" portaly aldyńǵy jańalyqtarynda jazǵan bolatyn. Endi ol qazaqstandyq jankúıerlerden keshirim surady. Bul týraly "Qamshy" portaly Tengrinews.kz-ke silteme jasaı otyryp habarlaıdy. 

"Borat týraly tvıtim úshin keshirim suraımyn, bul tek ázil bolǵan edi. Qazaqstan men qazaqstandyqtardy mazaq etkim kelmegen", - dedi Podolskı óz jazbasynda qazaqstandyqtardan keshirim surap.

Eske sala keteıik, Podolskı Chempıondar lıgasynyń toptyq kezeńindegi tartylǵan jerebeniń qorytyndysynan keıin  Twitter degi paraqshasyna : "Erekshe kútemin" dep aty shýly keıipker "Borattyń" sýretin qoıyp jazǵan bolatyn.

Fanattar fýtbolshynyń pikirine narazylyq tanytty. Keıbiri ÝEFA-ǵa shaǵym túsirýdi usynsa, keıbiri fýtbolshydan alańda kek alý kerektigin aıtty. Sonymen qatar, jankúıerler Podolskıdiń Borattyń keıpindegi sýretin salý ıdeıasyn qoldap jatyr. Keıbir qoldanýshylar Podolskıge Astananyń sýretin jiberip, Qazaqstannyń Borattyń fılmindegideı emes ekenin dáleldeýge tyrysyp jatyr.

Aıta keteıik, túrkıalyq klýbtyń jankúıerleri de Podolskıdiń áreketine jaýap qatty: "Poldı, mundaı keıipkerdiń sýretin jarıalaý saǵan tán nárse emes. Qarsylasqa qurmet kórsetý kerek",-deıdi olar.