Tuńǵysh prezıdent Nursultan Nazarbaevtyń tóraǵalyǵymen "Samuryq-Qazyna" ulttyq ál-aýqat qoryn basqarý jónindegi keńestiń otyrysy ótti.

– Bizdiń búgingi jıynymyz kúrdeli kezeńde ótip otyr. Alpaýyt elder arasyndaǵy básekelestik pen teketires kúsheıip barady. Qazaqstan ekonomıkasyna úlken salmaq túsýde. Sonymen birge bul jańa ekonomıkalyq model qalyptastyrý úshin qajetti reformalar júrgizý múmkindigi, – dedi Nazarbaev.

Tuńǵysh prezıdent qordy qaıta qurý máselesin talqylaý barysynda tıimsiz ınvestısıalardy qysqartyp, tabysy joǵary ınvestısıalarǵa aýystyrýdyń mańyzdylyǵyn atap ótti.

– Biz negizgi maqsattardy Qordyń 2028 jylǵa deıingi jańartylǵan damý strategıasynda aıqyndadyq. Eń bastysy – taıaý merzimde "Samuryq-Qazyna" qorynyń jumysyn jańa formatqa kóshirip, jetekshi táýelsiz ál-aýqat qorlary sıaqty ınvestholdınge aınaldyrý. Bizge Qordyń portfelindegi aktıvterdi geografıasy men salasyna qaraı ártaraptandyrý kerek. Tıimsiz ınvestısıalardan arylyp, olardy barynsha tabys ákeletin ınvestısıaǵa aýystyrý qajet. Bul dıvıdendterdiń ósýi esebinen búdjetke túsetin túsimderdi ulǵaıtýǵa múmkindik beredi, – dedi "Samuryq-Qazyna" ulttyq ál-aýqat qoryn basqarý jónindegi keńestiń tóraǵasy.

Sonymen qatar Nazarbaev daǵdarys jaǵdaıynda Úkimet otandyq bıznesti qorǵaý úshin teńdessiz sharalar qabyldaǵanyn atap ótti.

– Tótenshe jaǵdaı kezeńinde halyq pen bıznesti qoldaý, ekonomıkalyq turaqtylyqty saqtaý úshin daǵdarysqa qarsy sharalardyń úsh birdeı toptamasy qabyldandy. Biraq pandemıa báseńder emes. Onyń ekinshi kezeńi boljanýda. Mundaı kúrdeli jaǵdaıda buǵan deıin atap ótkendeı, otandyq kásipkerlerge qoldaý kórsetý qajet, – dedi Elbasy.

"Samuryq-Qazyna" aksıonerlik qoǵamynyń basqarma tóraǵasy A.Esimovtiń aqparatyn tyńdaı kele, Nursultan Nazarbaev bıznes belsendiliktiń kúrt tómendeýi jaǵdaıynda kvazımemlekettik sektordyń memlekettik tapsyrystary men satyp alýlary óndiristik kásiporyndarǵa jáne kásipkerlerge kómek kórsetýdiń tıimdi sharasyna aınalǵanyn atap ótti.

– 2018-2020 jyldar aralyǵynda qordyń satyp alýynyń 93 paıyzy, ıaǵnı jalpy sommasy bir trıllıon teńgeden asatyn 4200 pozısıa básekelestik ortaǵa berildi. 23 myńǵa jýyq kásipkerlik sýbektiler satyp alýǵa tikeleı qol jetkizdi. Osy kezeńde bir kózden satyp alý 60 paıyzǵa azaıǵan. Nátıjesinde 400 mıllıard teńgeden astam qarjy únemdeldi. Osy jumysty jalǵastyrý kerek, – dedi qordy basqarý jónindegi keńestiń tóraǵasy.