Tehnologıalyq kásipker Ilon Mask koronavırýs juqtyrǵan bolýy múmkin ekenin málimdedi. Mıllıarderdiń sózinshe, jaǵdaıy ortasha. Biraq onyń aýrý jaǵdaıy týraly ártúrli zerthanalar bir-birine uqsamaǵan nátıje kórsetken. Bul týraly BBC jazdy.

Pandemıa alǵash bastalǵan kezde, Mask koronavırýstyń qaýiptiligin tómen baǵalaǵan.

Tesla men SpaceX kompanıasynyń 49 jastaǵy basshysy tvıtterde óziniń aýrý belgileri týraly "sál joǵary jáne tómen" dene qyzýy baryn, kádimgi tumaý tıgen sıaqty sezingenin, biraq denesi aýyratynyn jazǵan.

Juma kúni ol antıgendi jyldam testileýdiń durystyǵyna kúmándanyp, tvıtterde "Óte jalǵan nárse bolyp jatyr. Búgin tórt ret kovıdke test tapsyrdym. Eki test teris, ekeýi oń bolyp shyqty. Sol apparat, sol test, sol medbıke" dep jarıalaǵan.

Qazirgi kezde AQSH-ta shamamen 10,9 mıllıon adam koronavırýs juqtyrǵan. 245 myńnan astam adam vırýstan qaıtys bolǵan, 67 myńnan astam adam aýrýhanada jatyr.

AQSH-tyń 35 shtatynda kópshilik oryndarda betperde kıý talap etiledi.