11 qarashaǵa qaraǵan túni azamattyq belsendi Dýlat Aǵadildiń uly Janbolat Aǵadildiń pyshaq jaraqatyn alyp, mert bolǵany habarlanǵan edi. Osy oqıǵadan keıin áleýmettik jelide Ómirjan Rahmet esimdi jigittiń "Janbolat Aǵadildi abaısyzda pyshaqtadym" degen vıdeosy tarady. Nur-Sultan qalasy polısıa departamenti atalǵan vıdeoǵa baılanysty pikir bildirmedi. Kúdikti retinde ustalǵan 1999 jylǵy Ómirjan Rahmet áli kúnge qamaýda. Ony jaqyndarymen, advokatpen sóılestirmeıdi. Qamshy tilshisimen telefon arqyly áńgimelesken kúdiktiniń anasy, İ toptaǵy múgedek Inabat Abdıeva balasynyń kinási joq ekenin, oǵan áldekimder jala jaýyp otyrǵanyn, tóbeles kúni kóńilge kúdik uıalatatyn keıbir jaıttar bolǵanyn aıtty.

Kúdikti Ómirjan Rahmet áskerden kelgen soń 2020 jyldyń sáýir aıynda jumys isteý úshin Jambyl oblysy Qulan aýdanynan Nur-Sultan qalasyna kelgen. Qyrkúıek aıynda qaryndasy elordaǵa oqýǵa túsip, anasy ekeýin kóshirip ákelip, barlyǵy birge páter jaldap turǵan. Inabat Abdıeva oqıǵa bolǵan kúni aýrýhanaǵa qaralý úshin Tarazda júrgen. Jaǵdaıdy estip, dereý astanaǵa kelgenimen, balasyn áli kórmegen.

Inabat Abdıevanyń sózinshe, Ómirjan Rahmetti 11 qarashada úıde otyrǵan jerinen Azamat esimdi tanysy shaqyryp alǵan.

– Balam sol kúni qyzym ekeýi úıde otyrǵan. Qyzymnyń aıtýynsha, túnde Azamat degen tanysy habarlasyp, "bratan, kelip alyp ketshi" depti. Ómirjan shaqyrǵan jerge óziniń Mersedes kóligimen baryp, jańaǵy balany alyp ketken. Artynsha ekeýi de ustalyp, Janbolat Aǵadildiń qaıtys bolǵanyn bilgen. Balamnyń mashınasy tóbeles ornynda bolmapty. Al polıseıler ony tóbeleske qatysty dep otyr. Al balam ol ýaqytta whatsapp arqyly qurbysymen sóılesip, foto jiberip otyrǵan. Iaǵnı tóbeles bolǵan jerde bolmaǵan. Tek joldasyn alyp ketýge ǵana kelgen, – deıdi ol.

Múgedek ananyń aıtýynsha, Azamat esimdi bala Ómirjanǵa jala jaýyp otyr.

– Men qazir bárinen surastyryp jatyrmyn. Kúdikti retinde ustalǵandar arasynda báriniń qoly bos bolyp, tek meniń balamdy ǵana eki búktep alyp ketken. Polısıaǵa jetkizilgen soń oqıǵanyń mán-jaıyn jazǵanda álgi Azamat degen bala bar kináni Ómirjanǵa artyp, "Ómirjan pyshaqtady" dep jazyp, "podstavıt" etip otyr. Ol balanyń (Azamat – red.) osy kúnge deıin polısıaǵa birneshe ret túskenin keıin bildik, – deıdi Inabat Abdıeva.

Kúdiktiniń anasy tergeýde túsiniksiz jaıttar bar ekenin atap ótti.

– Tergeý júrip jatyr deıdi. Eger tergeý aıaqtalmaǵan bolsa, balamnyń vıdeosyn nege shyǵardy? Polısıadan surasam, "biz shyǵarǵan joqpyz, ózderi shyǵarǵan shyǵar" deıdi. Osyndaı jaýap bola ma? Onyń ústine tóbeles bolǵan jerde beınebaqylaý kameralary bar. Biraq kamera dál sol kúni istemeı qalady da, ertesi kúni istep ketedi. Bul qalaı? Tóbeles bolǵan orynǵa jaqyn jerde kúzetshi bolypty. Endi sony qazir tappaı júr eken. Balamdy maǵan da, advokatqa da kórsetpeı otyr. Ómirjannyń bul iste esh kinási joq ekenine senimdimin. Balamdy Azamat degen bala "podstavıt" etip otyr. Men Azamat degen bala tergeý abaqtysynda Tik-Tok túsirip júr degendi estidim. Ol "ýslovno" alyp shyǵyp ketem dep emin-erkin júrgen kórinedi, – degen Rahmet Ómirjannyń anasy polısıa bólimine búgin de baryp, balasymen júzdese almaǵan.

Inabat Abdıeva endi ne shara jasaryn bilmeıdi.