Til tabıǵatynan áleýmettik qubylys bolǵandyqtan, buǵan beı-jaı qaraýǵa bolmaıdy. Feısbýkke eki sóılemdi qate jazǵannan, nemese bir sózdi, maqaldy, turaqty tirkesti burys qoldanyp qoıdym dep, qazir eshkimniń de basy aýryp, qınalyp jatqan joq. «Men qate jazǵannan qazaq tili buzylyp ketpeıdi» degen oı ár sanada oryn tepse ne bolarmyz. Sonda bárimiz de solaı burys jazyp, burys qoldanystardy turaqtatyp, turaqty tirkesterdi oryndy-orynsyz qoldanyp, varvarızmdi kúsheıte bersek, tildik qoldanys qaıda barady? Durys jazyp, durys sóıleıtinderdi syrttan izdeımiz be? 
Áleýmettik máni bar kez kelgen aqparat quralynyń lebizi, áleýmettik jelilerde jazylǵan aqparattar, tipti ol bir-er aýyz pikir qosý úshin jazylǵan sóılemnen tursa da, keń aýqymdy qamtıtyn qaýymǵa arnalǵandyqtan, ózindik lebizdik qundylyqqa ıe. Aqparatty tyńdaýshy men oqýshynyń nıeti de, deńgeıi de, biligi de ártúrli bolǵandyqtan, árkim odan ózinshe pikir túıeri anyq. Sondyqtan da ár zamandaǵy sóıleý tiliniń deńgeıine de, jazba tildiń deńgeıine de sol tilde sóıleıtin árbir adam jaýapty bolady. 
Til - ulttyq qundylyq bolǵanda, lebiz - áleýmettik-ıdeologıalyq naqtylyq. Ár túrli minberden aıtylǵan sóz de, ártúrli aqparat quraldarynda jazylǵan ne aıtylǵan aqparat ta sol ýaqytta qoldanylyp turǵan tildiń jaǵdaıynan, tildik ahýaldan habar beredi. Sóıleýshiniń nemese jazýshynyń, ǵalymnyń tili saqaý bolsa, sol ýaqytta qoldanǵan til (lebiz) saqaý degen sóz, nemese taza sóılep, sóz qoldanysy durys bolsa, sol ýaqyttaǵy sóıleý ne jazba tildiń deńgeıi joǵary degen sóz. Tek aty belgili úlken ǵalym nemese jazýshy ǵana tildik ahýaldy anyqtap qoımaıdy, bizdiń kez kelgenimiz tildik ahýaldy qalyptastyrýǵa jáne ony durys qoldanýǵa qyzmet etemiz jáne óz zamanymyzdaǵy sózdiń qunyn arttyryp, mánin keltiretin de Biz. Óıtkeni bárimiz jınalyp «halyq» atty ulylyqty quraımyz.

Anar Salqynbaı, Facebook paraqshasynan