Memleket basshysy Konstıtýsıalyq keńestiń tóraǵasy Qaırat Mámıdi qabyldady. Bul týraly akorda.kz habarlady.

Qasym-Jomart Toqaevqa Qazaqstan Respýblıkasy Konstıtýsıasynyń 25 jyldyǵyna oraı ótken sharalardyń qorytyndysy jaıynda baıandaldy.

Qaırat Mámıdiń aıtýynsha,  konstıtýsıanyń mereıtoılyq is-sharalaryn uıymdastyrý jáne ótkizý jónindegi ulttyq jospar koronavırýs pandemıasy týdyrǵan qıynshylyqtarǵa qaramastan júzege asqan.

Prezıdentke mereıtoı sheńberinde ótken is-sharalar qorytyndysy boıynsha Ata Zańnyń áleýetin jan-jaqty iske asyrý jáne eldegi konstıtýsıalyq zańdylyq júıesin nyǵaıtýǵa baǵyttalǵan usynystar týraly aqparat berildi. Usynystardyń bir bóligi Konstıtýsıalyq keńestiń quqyqtyq negizin odan ári jetildirý jáne azamattardyń konstıtýsıalyq quqyqtaryn qorǵaý kepildigin kúsheıtýge baılanysty kelip túsken.

Qasym-Jomart Toqaev Konstıtýsıa Qazaqstannyń memlekettiligi men elimizdiń strategıalyq damýynyń negizi ekenin aıtty. Táýelsizdiktiń 30 jyldyǵy aıasynda memlekettik organdar men azamattar konstıtýsıalyq talaptardy tereń túsinýi jáne ony basshylyqqa alýy kerek.