Tótenshe jaǵdaılar mınıstrligi Nur-Sultan qalasynda dámhanada bolǵan jarylys týraly qosymsha aqparat jarıalady.
Mınıstrlik baspasóz qyzmetiniń málimetinshe, 21 qarashada saǵat 12:25-te Nur-Sultan qalasy tótenshe jaǵdaılar departamenti kezekshi-dıspecherlik qyzmetiniń púltine Shubar shaǵyn aýdanyndaǵy "Halalbrothers" dámhanasynda gaz balon jarylyp, órt shyqqany týraly habarlama túsken.
Órt sóndirýshiler oqıǵa ornyna saǵat 12:32-de kelgen boıda jarylys saldarynan eki qabatty kotejge japsarlas salynǵan qurylys pen qazandyqtyń ishinara qabyrǵalary jáne shatyry qulaǵany anyqtaldy. Sonymen qatar 20 sharshy metr kólemde japsarlas salynǵan qurylys pen qazandyqtyń shatyry janǵan. Qurylystyń 100 sharshy metri (jalpy kólemi 600 sharshy metr) qıraǵan. Jarylys saldarynan as úıdiń shatyry qulaǵan.
Mınıstrliktiń baspasóz hatshysy Talǵat Ýálıdiń aıtýynsha, qutqarýshylar oqıǵa ornynan 35 gaz balondy alyp shyqqan.
"Elordalyq qutqarýshylar oqıǵa ornynan 35 gaz balondy shyǵardy. Úıindiniń arasynan 1998 jyly týǵan qyzdy qutqardy, ol jabyq bas mı zaqymyn alǵan. Ókinshke qaraı, oqıǵa ornynda dámhanada ydys jýýshy bolyp qyzmet atqaratyn 1968 jyly týǵan áıel adam qaza tapty.
Jedel medısınalyq kómek brıgadasy 34 adamdy emhanaǵa jetkizdi. Onyń ishinde 11-i dáriger qaraǵannan keıin úılerine jiberildi, 23-i aýrýhanaǵa jatqyzyldy. Zardap shekken adamdardyń barlyǵy dámhana jumysshylary. Sondaı-aq jarylys saldarynan 3 avtokólik zıan keltirildi" dep jazdy ol facebook paraqshasynda.
Kólemi 20 sharshy metr órt saǵat 12:58-de sóndirildi. Avarıalyq-qutqarý jumystary saǵat 16:59-da aıaqtaldy. Órttiń shyǵý sebepteri anyqtalyp jatyr.
"Oqıǵa ornynda Nur-Sultan qalasy tótenshe jaǵdaılar departamenti, apattar medısınasy ortalyǵynyń 56 qyzmetkeri men 14 birlik tehnıkasy jumys jasady. Qala ákimdigi jáne tótenshe jaǵdaılar departmenti adamdar tońyp qalmas úshin KÝNG-kóligi men avtobýsyn jiberdi" delingen habarlamada.
Pikir qaldyrý