Premer-mınıstr Asqar Mamın koronavırýs ınfeksıasy týraly vedomstvoaralyq komısıa otyrysyn ótkizdi.

Densaýlyq saqtaý mınıstrliginiń málimetine súıensek, koronavırýspen syrqattanýshylyqtyń ósýi Qazaqstannyń barlyq óńirlerinde derlik tirkeldi. Vırýstyń reprodýktıvtilik kórsetkishi respýblıka boıynsha 1,07 paıyzdy quraıdy. Infeksıalyq tósek-oryndardyń tolyǵýy – 22%, reanımasıalyq tósek-oryndardyń tolyǵýy – 17%. 

"Qyzyl aımaqta" 5 óńir qalyp otyr: Shyǵys Qazaqstan, Pavlodar, Qostanaı, Soltústik Qazaqstan, Aqmola oblystary.

"Sary aımaqta" 2 óńir bar: Batys Qazaqstan oblysy jáne Nur-Sultan qalasy.

Úkimet basshysy densaýlyq saqtaý, ındýstrıa mınıstrlikterine ákimdiktermen birlesip, medısınalyq jabdyqtardy jetkizýdi aıaqtaýdy jáne ınfeksıalyq stasıonarlardyń reanımasıalyq bólimshelerin tolyq jabdyqtaýdy qamtamasyz etýdi tapsyrdy. 

Sondaı-aq Asqar Mamın epıdemıologıalyq ahýaldyń nasharlaýy múmkin jaǵdaıda vedimistik aýrýhanalar men gospıtáldardyń 100% daıyndyǵyn qamtamasyz etýdi aıtty. 

Ol vedomstvoaralyq otyrysta ishki ister, eńbek, bilim, qorǵanys mınıstrlikterine ákimdiktermen birlesip, uıymdastyrylǵan ujymdarda profılaktıkalyq jáne epıdemıaǵa qarsy is-sharalardyń saqtalýyna baqylaýdy kúsheıtýdi tapsyrdy. 

Sonymen qatar densaýlyq saqtaý mınıstrligine, ákimdikterge koronavırýs ınfeksıasyna jasalǵan zerthanalyq zertteýlerdiń durystyǵyn (qaıta testileýdi) qamtamasyz etý boıynsha sharalar qabyldaýdy da atap ótti.

Premer-mınıstr densaýlyq saqtaý mınıstrligine bir apta merzimde dári-dármektiń shekti qunyn tómendetý maqsatynda koronavırýsqa qarsy preparattardyń baǵasyn retteý tártibin ózgertýdi tapsyrdy.