"Nur Otan" partıasy aldaǵy májilis saılaýyn usynylǵan kandıdattardyń partıalyq tizimin jarıalady.

"Kandıdattardyń jalpy tiziminde parlament májilisiniń qyzmettegi depýtattary 20%-ten aspaıdy, memlekettik basqarý salasynyń ókilderi – 13%, bilim jáne densaýlyq saqtaý salasy – 12%, úkimettik emes uıymdar – 9% jáne ónerkásip – 8%.

Tizimniń úshten bir bóligi áıelder. Kandıdattardyń ortasha jasy aldyńǵy partıalyq tizimmen salystyrǵanda 4 jylǵa tómendep, 48 jasty qurady" delingen partıanyń facebook-tegi jazbasynda.

Partıa taratqan habarlamada tizim 126 kandıdattan turatyny, 77 kandıdat partıaishilik praımerız qorytyndysy, al 49 adam ortalyq partıalyq kvota boıynsha anyqtalǵany aıtylǵan.

Olardyń ishinde Qazaqstan premer-mınıstri Asqar Mamın, Nur Otan partıasy tóraǵasynyń birinshi orynbasary Baýyrjan Baıbek, Nursultan Nazarbaev qorynyń dırektory Darıǵa Nazarbaeva, májilis tóraǵasy Nurlan Nyǵmatýlın, prezıdent ákimshiliginiń basshysy Erlan Qoshanov, prezıdenttiń kómekshisi – prezıdent ákimshiliginiń ótinishterdi qaraýdy baqylaý bóliminiń meńgerýshisi Tamara Dúısenova, vıse-premer Eraly Toǵjanov, "Samuryq-Qazyna "ulttyq ál-aýqat qory" AQ basqarma tóraǵasy Ahmetjan Esimov jáne basqalar bar.