Bıken Rımova atyndaǵy Almaty oblystyq drama teatrynda aımaq basshysy Amandyq BATALOV dástúrli «Kóshbasshy-2020» jastar syılyǵynyń jeńimpazdaryn marapattady.

Baıqaýǵa 20 nomınasıa boıynsha 402 úmitker ózara synǵa tústi. Onyń ishinde, 56 úmitkerdiń materıaly ereje talaptaryna sáıkes kelmegendikten, irikteý kezeńinen shettetildi. Baıqaý nátıjesine sáıkes, Jetisý ólkesiniń 20 jasy óz salasynan úzdik dep tanylyp, jas kóshbasshy atandy.

Saltanatty sharada oblys ákimi Amandyq BATALOV sóz alyp, jastarǵa memleket mol úmit artatynyn, elimizdiń bolashaǵy óskeleń urpaqtyń qolynda ekenin aıtyp, jastardy bilim men sportqa beıim, jigerli, ushqyr oıly, bastamashyl bolýǵa shaqyrdy. Óz sózinde ákim oblystyń ekonomıkasyna, atap aıtqanda, aýylsharýashylyǵy, qurylys, ınvestısıa tartý baǵytyndaǵy oń kórsetkishterge toqtaldy.

Almaty oblysynda 400 myń jas bar. Elbasy atap ótkendeı, jastar barlyq ıgi bastamalardyń qasynda júrýi tıis. Elde tótenshe jaǵdaı jarıalanǵannan beri indetpen álemdik kúres sapynda Almaty oblysynyń jas eriktileri belsendi jumys júrgizýde. Óńirde «Meıirimdi Jetisý» eriktiler front-keńsesiniń jumysy qarqyndy júrgizilýde. Jyl basynda oblysta 1043 erikti bolsa, qazirgi tańda oblysymyzda 3200 den astam erikti jastar tirkelgen.

Osy jas eriktilerdiń qatysýymen respýblıkalyq «Biz Birgemiz» aksıasy aıasynda 2300 qaıyrymdylyq aksıasy men is-sharalar ótkizildi. Áleýmettik jaǵdaıy tómen, az qamtylǵan jáne kópbalaly otbasylar men jalǵyzbasty analarǵa, jalpy 26000 otbasyna áleýmettik kómek kórsetilip, azyq-túlikpen qamtamasyz etildi.

Oblysta "Dıplommen aýylǵa" baǵdarlamasy da sátimen júzege asyp jatyr. Odan bólek, "Jastar tájirıbesi" jobasy jas mamandardyń kásibı bilimin jetildirýge, eń bastysy – turaqty jumys oryndaryn tabýǵa oń yqpal etýde. Aǵymdaǵy jyldyń qarasha aıynda jumyspen qamtý ortalyqtaryna 15916 jas kelip, onyń 15597-i jumyspen qamtyldy. Josparǵa sáıkes, aǵymdaǵy jyly 1875 túlek "Jastar tájirıbesine" jiberildi. "Dıplommen aýylǵa" baǵdarlamasy aıasynda 848 jas maman kóterme aqy aldy. Baspana alý úshin 583 maman 2.3 mlrd.teńge kóleminde jeńildetilgen nesıe qarastyrylǵan.

Almat Esenbekov «Úzdik erikti» atalymynda top jardy. Alakól aýdanynda 2017 jyly «Bir arman» qaıyrymdylyq qoryn qurdy. Eriktilerden quralǵan qordyń ár múshesi ózgeniń muńyn óz muńyndaı kórip, joǵyn túgendeýge súıemdeı bolsa da úles qosýǵa umtylyp júr. Almat Esenbekov bastaǵan jalyndy jastar jetimge jylý, syrqatqa kúlki syılaýdan jalyqqan emes.

Búgin, mine, elengen eńbek pen tekken terdiń jemisin kóre otyryp, basqaǵa úlgi bolyp otyrǵan «Úzdik erikti»:

– Jetisý jastarynyń basty báıgesi sanalar «Kóshbasshy» syılyǵyn alý – úlken jaýapkershilikti júkteıtini jasyryn emes. Sebebi, óz mamandyǵyńnyń, kásibińniń kósh basynda bolý – úlken mindet. Búgingi syılyqty bıylǵy Eriktiler jylyndaǵy aıtýly jetistik dep sanaımyn. Óıtkeni, erikti bolý – taǵdyrymnyń tańdaýy ekendigi jasyryn emes. Osy kúnge deıin atqarǵan jumys, eńbek elenip, shyǵamyn dep oılamaǵan bıikke búgin qolym jetip otyr, – dep, marapattaý rásiminiń joǵary deńgeıde ótkendigin jetkizdi.

Kóshbasshylarǵa  oblys ákimi Amandyq Batalovtyń arnaıy dıplomy, estelik músinshe jáne 250 000 teńgeniń sertıfıkaty tabystaldy.

Shara sońy oblys ónerpazdary daıyndaǵan konserttik baǵdarlamaǵa ulasty. Sonymen, "Kóshbasshy - 2020" baıqaýynyń jeńimpazdary tómendegideı:

Úzdik jas memlekettik qyzmetshi - Muhtaruly Azamat (Qaratal aýd.)

Úzdik jas áskerı qyzmetker - Apasqan Abylaıhan Serikuly (Eskeldi aýd.)

Úzdik jas dáriger - Ómirbekova Ásel Jandáýletqyzy (Eskeldi aýd.)

Úzdik jas ustaz - Orazbaeva Albına Baglanovna (Qapshaǵaı q.)

Úzdik jas ǵalym - Jiger Berliqoja Begdaýletuly (Panfılov aýd.)

Úzdik jas sportshy - Jumabaeva Dınara Júnisbaıqyzy (Kóksý aýd.)

Úzdik jas jýrnalıs - Asylbekova Aıman Serikqyzy (Taldyqorǵan q.)

Úzdik jas kásipker - Nýrkejanov Damır Mýratovıch (Taldyqorǵan q.)

Úzdik jas batyr - Jarqynbekov Dáýren Eldosuly (Tekeli q.)

Aýylsharýashylyǵynyń úzdik jas mamany - Amangeldıeva Aıgýl Aıdarqyzy (Qarasaı aýd.)

Úzdik jas otbasy - Nurlanbekov Álıas, Kárim Gúlim (Aqsý aýd.)

Úzdik erikti - Esenbekov Almat Asqatovıch (Alakól aýd.)

Úzdik jas ónerpaz - Kenjebaev Baýyrjan Kaıratovıch (Alakól aýd.)

«Jasyl el» jasaǵynyń úzdik sarbazy - Seıdahmetova Elmıra Erbolatqyzy (Taldyqorǵan q.)

Úzdik stýdent - Turdash Madına Maratqyzy (Taldyqorǵan q.)

«Jas ulan» biryńǵaı balalar men jasóspirimder uıymynyń úzdik kóshbasshysy - Sultan Ajar Serjanqyzy (Qapshaǵaı q.)

Úzdik jastar isi jónindegi ádisker-nusqaýshy - Bolǵambaı Jánibek Oralqanuly (Eńbekshiqazaq aýd.)

Aýdandyq (qalalyq) jastar resýrstyq ortalyǵynyń úzdik mamany - Dosaly Baljan Erbolqyzy (Jambyl aýd.)

Jastar úkimettik emes uıymynyń úzdik kóshbasshysy - Rahmetqazynov Nurjan Nurlanuly (Qaratal aýd.)

Úzdik jas ádebıetshi - Toqtarbaı Eldos Núsipuly (Kóksý aýd.)