Almaty. Qamshy portaly - Aqtaýda jastarǵa arnalǵan úsh kúndik «Aktau Open Fest» halyqaralyq festıvali aıaqtaldy. Ata Zańymyzdyń 20 jyldyǵyna arnalǵan sharany úsh kúnde 60 myńdaı adam tamashalady.
Festıválge elimizdiń ónerli jastarymen qatar, Fransıa, Koreıa, Tájikstan, Reseı men Túrikmenstannan qonaqtar kelip, keremet shoý kórsetti. Olar breık-dans, parkýr, strıtbol jáne basketbol sıaqty kóshe bıleri men sporttyń 7 túri boıynsha ózara myqtyny anyqtady.
Aqtaýda AKTAU OPEN FEST 2015 atty halyqaralyq mýzyka jáne sport festıvali aıasynda breık-dans boıynsha álem chempıonaty úshin irikteý kezeńi engen bolatyn. Oǵan Tájikstannan, Ózbekstannan jáne Qazaqstannyń barlyq derlik óńirlerinen kelgen sportshylar qatysty.
Týrnır jeńimpazdary retinde Astanadan kelgen egizder, «23 Style» komandasynyń qatysýshylary Ádilet jáne Dáýlet Anarbekovter tanyldy.
«Buryn biz «Simple system» komandasynyń quramynda óner kórsetken edik. Jeńiske jetý úshin óte kóp jattyqtyq. Mańǵystaý oblysynyń ákimdigine chempıonatty uıymdastyrǵany, Ońtústik Koreıaǵa barýǵa múmkindik bergeni úshin zor alǵys aıtamyz. Biz jeńiske qol jetkizemiz! Bul biz úshin breık-dans boıynsha úshinshi álem chempıonaty bolmaq», - deıdi Ádilet Anarbekov.
Bul Mańǵystaý óńirinde ótip jatqan álem chempıonatyna úshinshi irikteý kezeńi. Onyń alǵashqysy 2010 jyly Jańaózen qalasynda ótken bolatyn. Saıysqa barlyǵy 80 adam qatysýda.
Sondaı-aq, jaǵalaýda Ortalyq Azıa sportshylary arasynda breık-bıinen álem chempıonatynyń irikteý kezeńi ótti. Júzden júırik shyqqandar Ońtústik Koreıada ótetin álem birinshiligine qatyspaq.
Sonymen qatar, AKTAU OPEN FEST 2015 jastar sporty festıvaliniń uıymdastyrýshylaryna graffıtı stılinde jumys jasaıtyn jergilikti sýretshiler Sergeı Rýdenko men Aleksandr Prıhodko aýmaǵy 103 sharshy metr sýretti tartý etti.
Sýret 3D formatynda oryndalǵan.
«Kompúterlik grafıka kómegimen 3D stılinde sýret salýdyń ońaılatylǵan tásilin oılap taptym. Ári, onyń tıimdi ekenine kóz jetkizdim. Dos sýretshilerdi tarta otyryp, jobany qolǵa aldyq. Festıvál logotıpin salýǵa sheshim qabyldap, sýretin ázirledik. Bul ıdeıany shara uıymdastyrýshylarymen birlesip talqylap, kólemin naqtyladyq. Sýretti salýǵa bir aıdaı ýaqyt jumsadyq», - deıdi Sergeı Rýdenko.
Sýretshiniń aıtýynsha, sýretti salýda onyń eki jazyqtyqtan turatyny qıyndyq týdyrǵan.
Osyndaı kórkem týyndyny dúnıege ákelýge Katá Ponamareva, Vladımır Válkov, Konstantın Baskakov, Marına Demchenko tárizdi óner ıeleri óz úlesterin qosqan. Olardyń aıtýynsha, sýretti salýǵa túrli tústi 98 boıaý balondary qajet bolǵan.
«Bul týyndyǵa biz kúshimiz ben qarajatymyzdy ǵana jumsaǵan joqpyz, ony bar jan-tánimizben saldyq. Turǵyndarǵa unap jatsa, qýanyshtymyz», - deıdi sheberler.
Festıvál aıasynda dúnıejúziniń áıgili kóshe bıiniń myqtylary jastarǵa sheberlik sabaqtaryn ótkizdi. Aktau Open Fest merekesi osymen úshinshi jyl qatarynan uıymdastyrylyp otyr.
