Almatyda «Qazaqstan muǵalimi 2020» ulttyq syılyǵynyń 10 laýreaty anyqtaldy. Bas júldeni – Nur-Sultan qalasyndaǵy «NZM» fılıalynyń hımıa páni muǵalimi Dınara Beısembaeva jeńip aldy.

Dınara Beısembaeva — hımıa pániniń muǵalimi, ekologıa magıstri, «Rasshırennoe Esse» jetekshisi, ǵylymı maqalalar men basylymdardyń avtory, daryndy balalardyń bilim alý qajettilikterine arnalǵan baǵdarlamanyń jasaýshylarynyń biri. Onyń oqýshylary ǵylymı saıystardyń jáne halyqaralyq olımpıadalardyń jeńimpazdary men júldegerleri.

10 laýreat Qazaqstannyń atynan júlde qory 1 mıllıon AQSH dollaryn quraıtyn «Álem muǵalimi-2021» Jahandyq syılyǵyna (Global Teacher Prize 2021) nomınasıalanatyn bolady.

Olardyń qatarynda Syılyq jeńimpazy — Dınara Beısembaeva, jáne 9 fınalǵa qatysýshylar bar. Atap aıtar bolsaq:

– Olga Kım — Qaraǵandy qalasy, № 27 orta mektebiniń bastaýysh synyp muǵalimi, erekshe bilim alý qajettilikteri bar balalardyń til damytý mamany;

–Erjan Jumadilov — Taraz qalasy, daryndy er balalarǵa arnalǵan «Bilim ınovasıa» mamandandyrylǵan lıseı-ınternatynyń fızıka pániniń muǵalimi;

– Alma Mahanova — Almaty oblysy, Jambyl aýdany, Qarǵaly aýyly bastaýysh synyp muǵalimi;

– Dına Qudabaeva — Qyzyljar qalasy, «Nazarbaev zıatkerlik mektebi» fılıalynyń fızıka pániniń muǵalimi;

– Arnýr Qazybekov — Nur-Sultan qalasy, NURORDA mektep-lıseıiniń fızıka pániniń muǵalimi;

– Meıramgýl Janaspaeva — Semeı qalasy, № 3 jalpy orta bilim berý mektep-kesheninde orys tili jáne ádebıet muǵalimi;

–Elena Varganova — Temirtaý qalasy, № 16 jalpy orta bilim berý mektebinde ekologıa jáne ózin-ózi taný pániniń muǵalimi;

– Janar Jaqsylyqova — Pavlodar qalasy, № 16 mektep-lıseıinde bastaýysh synyp muǵalimi;

– Gúlnar Jaqypova — Nur-Sultan qalasy, «Respýblıkalyq fızıka-matematıka mektebiniń» matematıka muǵalimi.

2019 jyly Qoǵamdyq mańyzy bar bastamalardy damytý qory Global Teacher Prize Jahandyq syılyǵynyń resmı ókili atanyp, 4 000 000 teńge júlde qory taǵaıyndalǵan «Qazaqstan muǵalimi» ulttyq syılyǵyn bastady.

Baıqaýdyń maqsaty – ozyq muǵalimderdi anyqtaý, qoldaý jáne kótermeleý, sondaı-aq elimizde pedagog eńbeginiń bedelin arttyrý.

«Qazaqstan muǵalimi-2020» Ulttyq syılyǵyna eńbek ótili úsh jyldan kem emes, kez-kelgen bastaýysh jáne orta bilim berý (orta mektepter, gımnazıalar, lıseıler) pedagogtary qatysýǵa múmkindik aldy.