Bestamaq aýylyndaǵy shoshqa fermasynan Aqtóbe oblysynyń ekologıasyna keltirilgen shyǵyn 7,2 mıllıard teńgege baǵalandy. Shoshqa fermasyna kórsetilgen aıyppuldy tóleýge bir aı ýaqyt berildi, dep habarlady "Moı Gorod" portaly. 

Kásiporyndy tekserý nátıjeleri týraly oblystyq ekologıa departamentiniń basshysy Nurjan Aqqul habarlaǵandaı, "Parıjskaıa komýna 21" JSHS kent mańyndaǵy transheıalarda kómilgen óndiristik jáne bıologıalyq qaldyqtardyń aýdany 5,6 gektardy qurady.

– Bul alańnyń lastanýyna baılanysty shyǵyn – 14 mıllıon teńge. Osyǵan baılanysty qylmystyq is bastaldy. Tekserý barysynda transheıanyń bir bóligi qazylyp, sol jerden 189 tonna qaldyq shyǵaryldy, – dedi Nurjan Aqqul.

Tekserýshiler anyqtaǵandaı, jobada málimdelgen 40 myń bas shoshqanyń ornyna fermadan 50 myńnan astam bas tabylǵan. Ekologıa departamentine suratylǵan málimetterdi usynbaǵany úshin de ákimshilik is qozǵaldy.

– Barlyq keltirilgen shyǵyn 7 mıllıard 27 mıllıon teńgeni qurady. Olar bir aı ishinde ótelmese biz sotqa júginemiz. Sondaı-aq, kásiporynǵa buzýshylyqtardy túzetý týraly uıǵarym berildi, eger olar oryndalmasa, sot arqyly onyń jumysyn toqtata turýdy talap etemiz, – dedi Aqtóbe oblysynyń bas ekology.

"Parıj komýnasy 21" kásipornynyń jumysy 2011 jyldan beri tekserilmegeni anyqtaldy.

Aqtóbe oblystyq veterınarlyq ınspeksıa basshysy Temirbek Nurtazınniń aqparaty boıynsha, shoshqanyń bir basyn soıǵan kezde 8,5 kılogramm qaldyq qalady. Bestamaqtaǵy shoshqa fermasynda kúnine 300 shoshqa soıylǵan, sondyqtan kúndelikti qaldyqtardyń kólemi 2550 kılogramdy quraǵan.

Bestamaq aýylyndaǵy shoshqa fermasyna qatysty janjal qarasha aıynyń ortasynda órshigen edi. Jergilikti turǵyndar aýdandaǵy ıis pen kirden sharshaǵan soń shoshqa keshenin jabýdy talap etken bolatyn.