Máselen, búgin "Aq jol" partıasynyń ókilderi Almatydaǵy sýsyn óndiretin zaýyt ujymymen kezdesti.

Bul zaýyt pandemıa salqynyn sonshalyq seze qoımaǵan. Óıtkeni, óndiste azyq-túlikke degen suranys azaımaǵan, dep habarlady "Aq jol" partıasynyń baspasóz qyzmeti.

Óndiriste  jylyna 60 mıllıon lıtr sýsyn óndiriledi. Aınalymdaǵy aqshanyń kólemi de aýqymdy. Sondyqtan zaýyttaǵy 200-den asa qyzmetker jumys ornyn saqtap qalǵan. Endigi másele olardyń áleýmettik jaǵdaıyn jaqsartyp, barynsha qolaıly orta qalyptastyrý. Buǵan qosa, kezdesý barysynda qoljetimdi baspana, sapaly medısına jáne bilim júıesine qatysty máseleler de kóterildi.

Parlament májilisi depýtattyǵyna úmitker Dmıtrıı Vasılevtiń pikirinshe, mundaı kásiporyndar otandyq ónim shyǵaryp, el ekonomıkasyn damytýǵa úlken úles qosyp jatyr. Sáıkesinshe, mundaı óndiristerdiń jumysshylaryna  jaıly jaǵdaı jasalýy kerek. «Aqjol» partıasynyń ókilderi aldaǵy kúnderi de osyndaı elimizdegi irili-usaqty óndiris oshaqtaryn aralap kórmek.

Al "Aýyl" partıasy búgin Túrkistan oblysy Qazyǵurt taýynyń etegindegi "Keme qalǵan" alańynda "Aýyldyqtar atqa qondy, qoldaıyq!"  atty aksıasy ótkizip, Qazaqstan Respýblıkasy parlamenti májilisi men máslıhat depýtattaryn saılaý naýqanynyń sımvolıkalyq túrde bastalǵanyn habarlady.

İs-sharaǵa májilis depýtattyǵyna kandıdattar: T.S.Rahımbekov, K. K. Aıtýǵanov, B. Tólegen, Z. A. Álipbekov, D. Kápuly, K. A. Aralbekova,  N. G. Arsútın, A. A. Satybaldın, D. K. Qýatov jáne B. D. Qystaýov qatysty.

– Ańyz boıynsha, adamzatty sý tasqynynan qutqarǵan Nuh kemesi osy jerge toqtady. Adamzat balasynyń ósip-ónýi dál osy jerden bastaý alady. Sondyqtan qasıetti Qazyǵurt jerin jańǵyrý jáne jańarý mekeni dep ataýǵa bolady. Sol sebepti "Aýyl" partıasy óziniń úgit-nasıhat naýqanyn osy jerden bastaýdy uıǵardy. 

"Atqa qoný" uǵymy  halqymzdyń múddelerin qorǵaý úshin kúsh jumyldyrýdy bildiredi. Atqa qonǵandar jaqsylyqtyń jarshysy, partıanyń josparlary men usynystarynyń habarshysy bolady. Sondyqtan barlyq kandıdattardyń birinshi kezektegi mindeti partıanyń saılaýaldy baǵdarlamasyn árbir aýylǵa, árbir qazaqstandyqqa jetkizý" – dep atap ótti Á. Bektaev.

Sondaı-aq osy kúni aldaǵy saılaýǵa qatysatyn, jýyrdaǵa ǵana rebrendıng jasaǵan Qazaqstan Halyq partıasy saılaýaldy shtabyn tanystyrdy.

QHP tóraǵasy, Qazaqstan Halyq partıasy parlamenttik fraksıasynyń jetekshisi, Májilis depýtaty Aıqyn Qońyrov jýrnalıserge partıanyń negizgi ıdeıalaryn baıandady.

– Saıası dodanyń mańyzdy kezeńi bastaldy, – dedi Aıqyn Qońyrov.

QHP OK hatshysy, Májilis depýtaty Jambyl Ahmetbekov pen QHP respýblıkalyq saılaýaldy shtabynyń basshysy Oljas Syzdyqov óńirlerde júrgizilip jatqan jumystar týraly baıandady. Májilis pen máslıhattarǵa kandıdattardyń qalaı iriktelgenin túsindirdi.

– Qazaqstannyń ár óńirinde partıanyń qalalyq jáne oblystyq fılıaldary jumys isteıdi. Olardyń bári jergilikti halyqpen tyǵyz baılanysta. Saılaý kúni jarıalanǵan soń QHP da daıyndyqty údetti. Oblystyq, qalalyq fılıaldardyń bazasynda saılaýaldy shtabtar uıymdastyryldy. Úgit-nasıhat jumystaryna daıyndyq barysy pysyqtaldy, – dedi Oljas Syzdyqov.

Saılaý aldynda ataýy ózgergen taǵy bir partıa – "ADAL" partıasy depýtattyqqa úmitkerlerdiń aımaqtardaǵy turǵyndarmen kezdesýleri bastalǵanyn jarıa etti.