Táýelsizdigimizdiń 29-shy jyly kúrdeli, qıyn ári erekshe boldy. Bul týraly prezıdent Qasym-Jomart Toqaev memlekettik nagradalar men syılyqtar tapsyrýǵa arnalǵan saltanatty rásimde aıtty. 

Onyń aıtýynsha, mundaı taǵdyrly synaqtar ár urpaqtyń basyna túse bermeıdi. Jahandyq daǵdyrysty eńsergen memleketimiz budan da zor maqsattar men mindetterdi kózdeıdi. 

–  Aldaǵy jyl – mejeli kezeń. Bul jyl el Táýelsizdiginiń 30 jyldyǵy aıasynda ótedi. Bul ótkenge kóz júgirtip, qorytyndy jasaıtyn ýaqyt. Halqymyz úshin osy mańyzdy datany naqty istermen jáne jańa jobalarmen qarsy alamyz. Dańǵaza aqsıalar men daýryqpa sharalardan bas tartyp, búkil is naqtylyqqa qurylatyn bolady. Ekonomıka, áleýmettik sala, ekologıadaǵy júıeli sharalardyń kólemdi keshenin iske asyrýdy jalǵastyramyz. Turǵyndardyń barlyq toptarynyń, ásirese jastar, áıelder, múmkindigi shekteýli jandardyń qajettilikterine basa mán beremiz. Biz elimizdegi saıası jańǵyrtý úderisin jalǵastyra beremiz, – dedi prezıdent.

Memleket basshysy kelesi jyldyń basynda jarıalanatyn jańa reformalar toptamasy týraly aıtty.

– Bul "halyq únine qulaq asatyn memleket" qurýǵa, ádilet jáne teń múmkindikter qaǵıdattaryn bekitýge baǵyttalǵan Qazaqstandaǵy demokratıalyq túrlenýge tyń serpin beredi. Májilis jáne barlyq deńgeıdegi máslıhattarǵa saılaý ótkizý kelesi jyldyń taǵy bir mańyzdy oqıǵasy bolmaq, – dep atap aıtty ol.

Qasym-Jomart Toqaev aldaǵy saılaý joǵary azamattyq belsendilik tanytyp, qoǵamnyń saıası saýatty ekenin kórsetetinine senim bildirdi.