Kentaý qalasynyń stýdentterinen qurylǵan «Jasyl el» eńbek jasaqtary jaıdary jazdy qyzyqty, ári tabysty ótkizdi. Qala kolejderinde bilim alýshy 40 jas maýsym-shilde aılarynda qalanyń kógaldandyrý men abattandyrý isterine atsalysty. Iaǵnı, saıabaqtar men kóshelerdegi, aleıalardaǵy gúlderdi sýaryp, kútip baptaý jumystaryn atqardy. Aǵashtardyń qýraǵandaryn otap, jasyl jelekterdiń boıyn birkelki qyrqyp shyqty.
Bul jumystardy atqarǵan jastardy qarjylandyrý máselesi de óz sheshimin tapqan. «Jasyl El» respýblıkalyq eńbek jasaqtary shtabynan ár stýdentke 17697 teńge tólense, qalalyq búdjetten 21364 teńge bólinip otyr. Sondaı-aq, jastar kepka, fýtbolka, sportıvka, shalbar, aıaq kıimmen tolyqtaı qamtamassyz etildi.
- «Jasyl El» eńbek jasaqtarynyń jumysy Kentaý qalasynda 2010 jyldan beri júrgizilmegen bolatyn. Bıyl Jastar ortalyǵynyń usynysymen, qala ákimi Á.Maqulbaevtyń qoldaýymen qaıta qolǵa alyndy. Baǵdarlama boıynsha Kentaý medısına koleji, Kentaý kópsalaly koleji, №7 kolejiniń stýdentteri qalada jumys atqardy. İs-sharalar aıasynda qalalyq Jastar ortalyǵynyń uıymdastyrýymen jastardyń tarıhı taǵylymdaryn arttyrý maqsatynda Báıdibek, Túrkistan, Otyrar aýdandarynyń tarıhı jerlerine saıahat jáne jastar qazaqstandyq ónimdi tańdaıdy atty fleshmob ótkizildi. Aldaǵy ýaqytta oblys ortalyǵyndaǵy mádenı oshaqtarǵa saıahat jasaý josparda bar, - deıdi Kentaý qalalyq "Jastar ortalyǵy" KMM dırektory Qanat Bekmetov.
Jalpy baǵdarlama elimizdi kógaldandyrýǵa jáne jastardy eńbekke baýlýǵa baǵyttalǵan. Jazǵy demalysta ýaqyttaryn tıimdi paıdalanyp júrgen jastar baǵdarlamanyń keler jyly qaıtalanǵandyǵyn qalaıdy.
- Biz qalamyzdyń kórkeıýine atsalysyp, gúldenýine óz úlesimizdi qosyp júrgenimizdi maqtan tutamyz. Ári aqsha taýyp, jańa oqý jylyna kıim almaqpyz. Ata-analarymyzǵa eshqandaı salmaq salǵymyz kelmeıdi. Jastardy eńbekke baýlıtyn «Jasyl el» baǵdarlamasy keler jyly da jalǵasyn tapsa degen usynysymyz bar, - deıdi Kentaý medısına kolejiniń 4 kýrs stýdenti, «Jasyl el» eńbek jasaqtarynyń jetekshisi Muhammetalı Muradov.
Mine, osylaısha kentaýlyq jastar jazǵy demalysyn qyzyqty ári tabysty ótkizýde.
