Jaqynda «Maqtaaral» fýtbol klýbynyń oıynshylary jýyrda ǵana óz ólkemizden oryn tepken «Tolaǵaı» men «Erkejan» jazǵy saýyqtyrý lagerine baryp, balalarmen kezdesti. Bul is-sharanyń maqsaty- jetkinshekterdiń sportqa degen ynta-yqylasyn oıatyp, búginde aýdannyń abyroıyn arqalap júrgen aıaqdop sheberlerimen tanystyrý, olarǵa eliktegen áýesqoılarǵa fýtboldyń qyr-syryn úıretip, fýtbolǵa baýlý.
Búginde lager ujymy altynshy aýsymdy qabyldap úlgeripti. «Tolaǵaıda» (dırektory- ªalymjan Boranbaev) ár aýsymda 250 baladan qabyldasa, «Erkejanda» (dırektory- Baýyrjan Kettebekov) 100 baladan. Aldymen lagerlerdiń tynys-tirshiligimen tanysqan qonaqtar jasóspirimderdi salaýatty ómir súrý saltyn ustanýǵa shaqyrdy. Aýdandyq dene shynyqtyrý jáne sport bóliminiń basshysy Jandarbek Tateev, «Maqtaaral» FK-nyń dırektorynyń orynbasary ábdiǵappar Ýsmanov, komandanyń bas jattyqtyrýshysy Shaızıdın Kenjebaev, jattyqtyrýshy Tımýr Iksanovtar bastaǵan komandanyń jetekshi oıynshylary bolashaq jastardy sportqa tartyp, aqyl-keńesterin aıtty. Sondaı-aq, estelikke atalmysh klýbtyń sımvoly beınelengen sporttyq bas kıim men aıaq doptar tartý etti. Al, kásipqoı oıynshylarmen birgelikte fýtbol oınaǵan balalardyń qýanyshynda shek bolmady. Tipti, «Tolaǵaı» komandasy 4:1 esebimen aǵalaryn eseńgiretkende esten ketpes estelikterge bólendi. Aıta ketý kerek jaqynda ǵana «Maqtaaral» komandasynyń quramyna jańadan qosylǵan afrıkalyq Gızýmen estelikke sýretke túsip, qoltańba alýshylar tym kóp boldy.

Mine, osylaısha Oral qalasyna «Aqjaıyq» komandasymen kezdesý sapary aldynda balalarǵa shattyq kóńil-kúı syılaǵan «Maqtaaral» fýtbol klýbynyń oıynshylaryna sát-sapar tilep, tek qana jeńispen oralýyna tilektespiz.

Derekkózi: maktaral.gov.kz