Búgingi tirshilik jármeńkesi qyzý qaınap, adam balasy ómirdiń barlyq salasyna birdeı úlgerýge tyrysqan qoǵamda bala tárbıesiniń de mańyzy asa erekshe. Dana oıshyl J. Balasuǵyn «Óner-bilim berem deseń basynan, oqýǵa ber balańdy jasynan» degendeı, - jas óskinge qazirgi zaman talabyna saı tárbıe berip, mektepke daıarlaý barysynda balabaqshanyń aıryqsha ról atqaratyndyǵyn basa aıtqymyz keledi. Bala dúnıege kelgennen keıin, týý týraly kýáligin rásimdegen sátten bastap, balany memlekettik bala baqshaǵa kezekke qoıamyz. Olaı bolsa, ata-analar nazaryna balalardy balabaqshaǵa qoıý kezegi týraly málimetterdi usynbaqpyz. Balabaqshaǵa tirkelýge ótinishti Halyqqa qyzmet kórsetý ortalyǵyna baryp ózine-ózi qyzmet kórsetý sektory nemese Mobıldi qosymsha egov.kz, www.egov.kz portaly arqyly berýge bolady. Jas analar men ákeler úshin kezekke onlaın qoıý tásili qolaıly, sebebi bul úıden shyqpaı-aq júzege asyrylady. Balabaqshaǵa birinshi kezekti alý quqyǵyna: múgedekterdiń balalary; ata-anasynyń qamqorlyǵynsyz qalǵan balalar; jetim balalar; kópbalaly otbasynyń balalary; jeńildikter jáne kepildikter boıynsha soǵysqa qatysýshylar jáne soǵys múgedekterine teńestirilgen tulǵalardyń balalary ıe bolady. Eskere ketetin jaıt, portal arqyly qyzmetti alý ýaqytynda tulǵalardyń elektrondyq sıfrlyq qoltańbasy bolýy qajet. Al, HQKO arqyly qyzmetti alý úshin: belgilengen nysandaǵy ótinish; ata-analardyń biriniń nemese zańdy ókilderiniń jeke basty kýálandyratyn qujaty; balanyń mekenjaı paraǵy nemese qyzmetti alýshynyń turǵylyqty jerin rastaıtyn ózge de qujat usynýy qajet. Qujattar tekserý úshin kóshirmelerde jáne túpnusqalarda usynylady, osydan keıin qujattardyń túpnusqalary alýshyǵa qaıtarylady. Balany balabaqshaǵa kezekke qoıý barysynda túsinbeýshilikter týyndaǵan jaǵdaıda biryńǵaı baılanys ortalyǵynyń 1414 telefonyna qońyraý shalýǵa bolady. Qońyraý shalý tegin. «HQKO» RMK-nyń OQO boıynsha fılıalynyń Otyrar aýdandyq bóliminiń ınspektory Mahanbetov Nýrbol Nýrıdınovıch