14 jeltoqsanda Nur-Sultan qalasynda «Aqyndar aýyldy jyrlaıdy» atty ádebı-poetıkalyq keshi ótti. 

Atalǵan sharaǵa «Aýyl» Halyqtyq-demokratıalyq patrıottyq partıasynyń tóraǵasy Álı Bektaev, Qazaqstan Respýblıkasy Parlamenti Májilisiniń depýtattyǵyna kandıdattar Dáýletkereı Kápuly men Zeıin Álipbek qatysty.

Sondaı-aq rýhanı keshke partıanyń 2017 jyldan beri jyl saıyn ótkizip kele jatqan «Aýylym - altyn tuǵyrym» onlaın-baıqaýynyń jeńimpazdary men qatysýshylary da jınaldy.

Atalǵan baıqaýdyń basty maqsaty - ulttyq qundylyqtardy dáripteý jáne aýyldyń rýhanı ómirin, tynys-tirshiligin, aýylda bolyp jatqan áleýmettik-ekonomıkalyq prosesterdi sıpattaý arqyly ulttyq qundylyqtardy nasıhattaý.

Kesh barysynda sóz alǵan partıa tóraǵasy Álı Bektaev:

«Aýyl taqyryby – eshqashan taýsylmaıtyn, esh shekarasy joq, eshteńemen shektelmeıtin kúrdeli taqyryp ekenine kózimiz jete tústi. Aýyldyń qasıeti men kıesin kórsetýdiń jaqsy bir joly – ádebı konkýrstar arqyly dáripteý ekeni belgili. Aýyl taqyrybyn sóz etken eń myqty shyǵarmalarǵa onlaın baıqaý jarıaladyq. Poezıa, proza, drama danrlary boıynsha ótken baıqaýǵa elge tanymal aqyn-jazýshylar qazylyq etti. Bul ıgi bastama dástúrge aınalyp, jyl saıyn ótkizilip keledi. Sol arqyly el arasynan qanshama myqty jas talanttar jaryqqa shyqty», - dep atap ótti.

Al «ADAL» partıasynan Májilis depýtattyǵyna kandıdattar 14 jeltoqsan kúni kezdesý ótkizdi. Kezdesý barysynda partıanyń ekonomıkalyq sektorlaryn damytýdyń jańa ıdeıalary, halyqtyń ártúrli sanattaryn qoldaý jónindegi usynystary, kópshilikti tolǵandyratyn ózekti problemalar qarastyryldy.

Máselen, Shiderti aýylynda bolǵan Oljas Ordabaev pen Aqmaral Bekmyrzaeva baǵdarlamanyń negizgi tarmaqtaryn kórsetip, partıanyń jalpy ıdeologıasy men qundylyqtary týraly sóz qozǵady.

Aýyl turǵyndary naýqastardyń dári-dármekpen ýaqytyly qamtamasyz etilmeýi, sondaı-aq jaıylymdyq jerdiń joqtyǵy syndy birneshe máselemen shaǵymdandy.

Oljas Ordabaev bul máseleler partıanyń baqylaýyna alynatyndyǵyna sendirdi.

Ekibastuz qalasy turǵyndarynyń arasynda problemaly nesıeleri bar kásipkerler kóp eken. Aqmaral Bekmyrzaeva partıanyń osyndaı nesıelerge jappaı raqymshylyq jasaý týraly usynysy týraly aıtty.

Kezdesýde Oljas Ordabaev elimizdiń árbir turǵyny partıanyń veb-saıty arqyly kez-kelgen aımaqty damytý boıynsha óz usynystaryn engizýge, eldi mekenderdiń búdjetteri týraly aqparat alýǵa jáne t.b. múmkindikteri bar ekenin jetkizdi.

Partıa múshesi Ardaq Nazarov Taraz qalasyndadaǵy "Taraz-Ǵasyr" kolejinde jastarmen kezdesý ótkizdi. Ardaq Nazarov ózi týraly, balalyq shaǵy, sporttyq mansabyn qalaı bastaǵany týraly aıtyp berdi.

"Bala kezimizde biz jaqsy jaǵdaıda ómir súrmegenimizge qaramastan, men synǵan joqpyn, jaman jolmen júrmedim. Menińshe, bul mańyzdy. Eńbekqor bolý mańyzdy. Tek eńbek arqyly ǵana tabys pen molshylyqqa qol jetkizýge bolady", - dep atap ótti ol.

Almatyda Qazaqstan Halyq partıasynyń ókilderi qaladaǵy orta mektepterdiń, sondaı-aq kolejder men joǵary oqý oryndarynyń pedagogtary jáne oqytýshylarymen kezdesti.

QHP ókilderi Qazaqstandaǵy bilim berýdiń negizgi problemasy – onyń qoljetimsizdigi ekenin atap aıtty. Olardyń pikirinshe, teorıalyq turǵydan alǵanda bizdiń elde barlyǵyna tegin orta bilimge kepildik berilgen. Alaıda keı jerlerde sapaly bilim tek elıta ókilderine ǵana arnalǵandaı. 

– Meıli ol qalada nemese aýylda tursyn, ár bala, mekteptiń ár túlegi ózderi qalaǵan bilimge qol jetkizýi kerek, – dedi QHP Almaty qalalyq fılıalynyń jetekshisi Álibek Shapenov. 

QHP jaǵdaıdy jaqsartý úshin ne usynyp otyr? Eń aldymen bilim berýdi sapaly, tegin jáne el halqynyń barlyq sanattary úshin qoljetimdi etý kerek.

– Bilim berý – memlekettiń júıe quraýshy ınstıtýty. Sapaly jáne qoljetimdi bilimge ınvestısıa quıý – bul Qazaqstannyń adamı kapıtalyna quıylǵan ınvestısıa, – deıdi partıalyqtar.

​«Aq jol» partıasynyń kandıdattary Shymkent qalasyndaǵy «Medıker» medısınalyq birlestigi ujymymen kezdesti. Kezdesýge medısınalyq mekemeniń dárigerleri, qala jastary, partıa músheleri men kásipkerler qatysty.

Jıynda «Aq jol» partıasy Shymkent fılıalynan Qazaqstan Respýblıkasy Parlament Májilisi depýtattyǵyna úmitker Turan Ábjanov partıanyń saılaýaldy baǵdarlamasymen tanystyrdy.

​- Bıyl elimizde jaılaǵan COVID-19 indetimen jan aıamaı kúresken sizderge alǵys bildiremin. Ózderińiz bilesizder «Aq jol» partıasy epıdemıany eskere otyryp, dáriger men medısına qyzmetkeriniń materıaldyq jaǵdaıyn qamtamasyz etý, sondaı-aq aq halatty jandardyń kásibı jáne adamı qasıetterin qorǵaý úshin  olardyń mártebesi týraly Zańdy ázirleýdi usyndy. Sizderdiń eńbekterińizdi biz árqashan baǵalaımyz jáne qurmetteımiz, - dedi Turan Álimhanuly.