Reseı prezıdenti Vladımır Pýtınniń baspasóz hatshysy Dmıtrıı Peskov Reseı dýmasynyń depýtattary Vácheslav Nıkonov, Evgenıı Fedorov, Vladımır Jırınovskııdiń Qazaqstan memlekettiligi týraly aıtqan daýly málimdemelerine pikir bildirdi.

"Reseı Federasıasynyń konstıtýsıasyna sáıkes, eldiń syrtqy saıasatyn prezıdent aıqyndaıdy" delingen Peskovtyń KazTAG agenttigine bergen jaýabynda.

Buǵan deıin Reseı memlekettik dýmasynyń depýtaty Vácheslav Nıkonov "Qazaqstan aýmaǵy Reseı tarapynan jasalǵan úlken syı" dep málimdegen. Depýtat sózi Qazaqstanda qyzý talqylanyp, Qazaqstan syrtqy ister mınıstrligi depýtatqa narazylyq nota joldaǵan. Uzamaı taǵy bir Reseı depýtaty Evgenıı Fedorov "Qazaqstan Reseıge óz aýmaǵyn qaıtarýǵa tıis" dep, Qazaqstan terıtorıa Reseı tarapynan jasalǵan syılyq ekenine meńzep, ony syıǵa berilgen kóliktiń mysalynda túsindirýge tyrysqan. Artynsha Almatyda týǵan Reseı depýtaty Vladımır Jırınovskıı Nıkonov sózin qoldaıtynyn jetkizip, "tutas Qazaqstan Reseıdiki" dep málimdedi.

Reseı dýpýtattarynyń mundaı málimdemeleri Qazaqstanda qarsylyq tolqynyn týdyrdy. Áleýmettik jelide azamattar depýtattarǵa narazylyqtaryn bildirip jatty.

Syrtqy ister mınıstrliginen bólek, depýtattar da másele boıynsha ustanymdaryn bildirdi.

Májilis depýtaty Baqytbek Smaǵul Vácheslav Nıkonovty "arandatýshy" dep atasa, senator Muhtar Qul-Muhammed Nıkonov málimdemesine "Bul – saıası jaýapsyzdyq qana emes, berik dostyq qarym-qatynas ornata bilgen mıllıondaǵan qazaq pen orystyń tarıhı tanymyn qorlaý" dep baǵa bergen.

Al saıasattanýshy, burynǵy dıplomat Qazbek Beısebaev dýma depýtattarynyń mundaı málimdeme jasaýy "óte túsiniksiz", máselege prezıdent Toqaev aralaspasa bolmaıdy" dep aıtqan.

Saıasattanýshy Dosym Satpaev "eger Qazaqstan ózin qurmettemese, ózgeler de qurmetteýdi qoıady" dep, Qazaqstan bıligin batyl qadamdarǵa barýǵa shaqyrǵan.