Qazirgi tańdaǵy zaman aǵymyna ilesip, ozyq memleketterdiń sanatynan kóriný joldarynyń biri eldegi kásipkerlikti damytý bolyp otyr. Osyǵan oraı 2013 jyldyń 9 qyrkúıeginde Qazaqstan Respýblıkasynyń Ulttyq kásipkerler palatasy qurylǵan bolatyn. Bul – bıznes pen bıliktiń tıimdi seriktestigi negizinde kásipkerlikti damytý úshin jaǵymdy jaǵdaılardy qalyptastyrý maqsatymen qurylǵan komersıalyq emes, ózdiginen basqarylatyn uıym.  
Búgingi tańda negizinen Respýblıkamyzdaǵy qalalarda, onyń ishinde aýdandar men aýyldardaǵy shaǵyn jáne orta kásipkerlikti damytý salasy basty maqsat bolyp otyr. Osy oraıda ótken aptada aýdanymyzda Ońtústik Qazaqstan oblysynyń kásipkerler palatasynyń qyzmetkerleriniń qatysýymen semınar bolyp ótti. Semınarǵa aýdan ákiminiń orynbasary Q.Espenbetov, Sozaq aýdandyq kásipkerler palatasynyń dırektory, aýdandyq maslıhattyń depýtaty Ǵ.Elbergenuly, Ońtústik Qazaqstan oblysynyń kásipkerler palatasy dırektorynyń orynbasary G.Qarabekov,  Ońtústik Qazaqstan oblysynyń isker áıelder keńesiniń tóraıymy A.Arhabaeva, aýdanymyzdaǵy shaǵyn jáne orta kásipkerlikpen aınalysyp júrgen isker áıelder qaýymy jáne de BAQ ókilderi qatysty.
Atalǵan jıynda kásipterin dóńgeletip otyrǵan názik jandylarmen ashyq suhbat júrgizildi. Kásipker azamatshalardyń arasynan aýdandyq isker áıelder keńesin qurý jóninde oblystyq kásipkerler palatasynyń qyzmetkerleri usynys jasady. Jıynǵa qatysýshylardyń qoldaýymen keńes quramy bekitildi. Semınarǵa kelgen qonaqtar «Baq-Nury» isker áıelder qaýymdastyǵynyń jumysymen tanysyp, júzege asyryp otyrǵan isteri kóńilge qýanysh uıalatatynyn jetkizdi. Qaýymdastyq múshelerine aýqymdy jumystary úshin alǵystaryn bildirdi.
Kimde-kim kózdegen kásibimen dittep aınalysatyn bolsa, sol kásiptiń shyńyna shyǵady degen pikir qalyptasty jıyn barysynda.

Sozaq aýdany ákimdiginiń baspasóz qyzmeti