Túrik jastary Reseı memlekettik dýmasynyń depýtattary Vácheslav Nıkonov pen Evgenıı Fedorovtyń "Qazaqstan aýmaǵy – Reseıdiń syıy" degen málimdemesine narazylyq bildirip, qazaq jáne túrik tilinde beıneúndeý joldady. Vıdeo túrkolog, fılolog Oǵyz Doǵannyń youtube arnasynda jarıalandy.

"Qazaqstan jalǵyz emes. Reseı, qolyńdy Qazaqstannan tart!" degen uranmen vıdeo túsirgen túrik jastary "Qazaqstan – álemge beıbitshiligimen zor úlgi bolǵan memleket" dedi.

"Qazaqstan úkimeti barlyq halyqtyń tatý ómir súrýi úshin qolynan kelgenin jasaıdy. Qazaq halqynyń basynan talaı qıynshylyq ótti. Biraq er minezdi, namysshyl ata-babalarymyz eshbir jaýdan taısalmady. Qasyq qany qalǵansha týǵan jerin qorǵaı bildi. Babalardan amanat bolyp jetken jerdi qorǵaý árbirimizdiń boryshymyz. Qazaqstan jalǵyz emes" delingen vıdeoda. 

Vıdeonyń oń jaǵynda Qazaqstannyń, sol jaǵynda Túrkıanyń memlekettik týy beınelengen.