«Nur Otan»-nyń Respýblıkalyq saılaýaldy shtaby Mańǵystaý oblysyna keldi. Kúni boıy bıleýshi partıa ókilderi aımaqtaǵy aýyldar men qalalardyń turǵyndarymen, sondaı-aq ónerkásiptik kásiporyndar qyzmetkerlerimen jáne taǵy basqa da azamattarmen kezdesti.

«MAEK-Qazatomónerkásip» energetıkalyq kombınatynyń ujymymen kezdesýde eńbek qaýipsizdigi jaǵdaılaryn jaqsartý jáne óndiristik jaraqatty azaıtý boıynsha partıa usynǵan sharalardy talqylady. Zańnamaǵa eńbek daýlary men janjaldaryn sheshý tártibin jeńildetý, eńbek zańnamasyn buzatyn adamdardyń jaýapkershiligin qatańdatý boıynsha túzetýler engizý týraly «Nur Otan»-nyń bastamasy qoldaýǵa ıe boldy.

Birqatar naqty usynystar aıtyldy. Mysaly, Aıbolat Sharaý Mańǵystaý turǵyndarynyń atynan óńirdiń basty ekologıalyq problemalarynyń biri – «Qoshqar Ata» quramynda ýran bar qaldyqtar qoımasyn rekýltıvasıalaý qajettigi máselesin kóterdi. Uzaq jyldar boıy sheshimin tappaǵan bul problemanyń halyq densaýlyǵyna qaýip tóndiretini eskerilip, partıa ony mindetti túrde oryndalýy tıis másele retinde aımaqtyq saılaýaldy baǵdarlamasyna engizdi.

Sondaı-aq, «Nur Otan» 25 eldi mekenniń 35 myńǵa jýyq turǵynyn sapaly aýyz sýmen qamtamasyz etý, 18 jańa mektep salý arqyly úsh aýysymdy mektep problemasyn sheshý, óńdeý ónerkásibiniń 14 kásipornyn ashý jáne 70 myńnan astam jańa jumys orynyn qurý jáne t.b. josparlaýda.

Osy kúni saılaýaldy shtab músheleri atajurtqa oralyp, Munaıly aýdany Mańǵystaý kentine qonys tepken qandastarmen de júzdesti.

Elbasy, partıa Lıderi Nursultan Nazarbaevtyń tapsyrmasyna sáıkes, tarıhı Otanyna oralýǵa bel býǵan qandastarǵa aqparattyq-quqyqtyq qoldaýdy kúsheıtý, sonymen birge olardy oqytý men áleýmettik beıimdeý de partıa josparynda bar. Osyǵan oraı kórsetiletin qoldaý da jedel ári ońtaıly bola túsedi.

Turǵyndarmen birge birqatar ózekti máseleler men olardy sheshý joldary talqylandy. Atap aıtqanda, «Nur Otan»-nyń saılaýaldy baǵdarlamasy aıasynda aýylda óte qajet bolyp otyrǵan 150 oryndyq kópsalaly aýrýhana salynady.

Budan soń partıa ókilderi belgili sáýletshi, qarymdy qalamger, Qazaqstannyń eńbek sińirgen qaıratkeri, Saıyn Nazarbektiń úıine arnaıy baryp, sálem berdi.

Osy oraıda, Respýblıkalyq saılaýaldy shtab jetekshisi Baýyrjan Baıbek aǵa býynǵa qamqorlyq tanytý árdaıym «Nur Otan»-nyń basty nazarynda bolatynyn basa aıtty.

Máselen, «Ardagerlerdi ardaqtaıyq» partıalyq jobasy sheńberinde jalǵyzbasty jáne egde tartqan muqtaj jandarǵa ataýly kómek kórsetý kózdelýde. Ár óńirde belsendi uzaq ómir súrý ortalyqtary ashylady.

Sondaı-aq, «Nur Otan» partıasy qart kisilerdi emdeýge mamandanǵan medısınalyq mamandardy daıyndaýdy uıymdastyrý máselesin de qolǵa alady.

«Biz saılaýaldy ýádeler aıasynda jyl saıyn yntymaqty zeınetaqyny ındeksasıalap, ony ınflásıa deńgeıinen 2% joǵary etý maqsatyn qoıyp otyrmyz. Zeınetaqyny taǵaıyndaý men resimdeýge qatysty barlyq úrdister proaktıvti formatqa kóshe otyryp, elektrondy túrde kórsetilýi tıis», - dep atap ótti Baýyrjan Baıbek.

Partıa baspasóz qyzmetiniń málimetine sáıkes, búgin «Nur Otan»-nyń úgit-nasıhat naýqanynyń 2-shi kezeńi bastalǵan. Bul rette bıleýshi partıanyń aldaǵy 5 jylǵa arnalǵan josparlary, sondaı-aq óńirlik praımerız qorytyndysy boıynsha kandıdattar tizimine engen aımaqtyq kóshbasshylar týraly egjeı-tegjeıli aqparat qamtylǵan 2 mln-nan astam úgit ónimderin taratý josparlanýda.

«Nur Otan» partıasynyń saılaý qory qarajaty esebinen tólendi