Ulttyq qordan 1 tıyn bólmeı, azamattardyń áleýmettik jaǵdaıyn jaqsartýǵa qarajat tabýǵa bolady. Bul týraly ADAL partıasynyń múshesi, jýrnalıs Maqsat Tolyqbaı "Qazaqstan" telearnasynda ótip jatqan teledebatta aıtty.

Jýrnalıs búdjet qyzmetkerleri jalaqysyn keminde 200 myń teńgege deıin kóterý, shákirtaqy mólsherin arttyrý, tómengi jalaqyny 42500 teńgeden 60 myń teńgege kóterý kerektigin atap ótti.

Sondaı-aq ol ADAL partıasy kásipkerler úshin jylyna 6 paıyzben kepilsiz nesıe usyný qajettigine nazar aýdardy.

– Jastardyń basty problemalarynyń biri –  baspana. Osy rette ıpotekaǵa alǵan baspananyń ózin kepilge qoıýdy júzege asyrýdy usynamyz. Óıtkeni jastarda kepilge qoıarlyqtaı múlik joq. Sonymen qatar alǵashqy jarnaǵa turǵyn úı sertıfıkattaryn berýdi 3 qaladan basqa qalalarda da júrgizý kerek. Partıanyń taǵy bir usynysy –  azamattardy bala týýyǵa yntalandyrý. 1 bala taptyń ba ıpotekadan 2 paıyzdy qysqart, 2 balaǵa 4 paıyzǵa qysqart. Sońynda úıdiń alǵan baǵasyn ǵana tólesin. Munyń bárine ulttyq qordan 1 tıyn jaratpaı-aq qarjy tabýǵa bolady. Ol úshin memlekettik satyp alý shyǵyndarynan únemdese jetkilikti. Sheneýnikterimiz bir jolǵa Kamrı kóligin emes, Korolla minsin, kabınetine qymbat kilem emes, arzanyraǵyn ilsin. Bolady ǵoı. Halyqty áýeli kedeıshilikten qutqarý kerek, –  dedi ol.