Reseıdiń Tomsk oblysy Karagasok aýdanynda mas kúıdegi áıel 12 jastaǵy ulyn soqqyǵa jyqqan. Atalǵan oqıǵany áıeldiń qurbysy vıdeoǵa túsirip, áleýmettik jelide jarıalaǵan. 

Karagasok aýdany prokýratýrasynyń málimetinshe, 19 jeltoqsan kúni keshke Kargasok aýdanynyń turǵyny jas balasyn mekteptegi jaman minez-qulqyna baılanysty urǵan. 

Vıdeodan balanyń anasynan urmaýyn ótinip, ekinshi olaı jasamaıtynyn aıtyp jylap jatqanyn kórýge bolady. Biraq áıel urýyn toqtatpaıdy. Sonymen qatar, áıel aldymen balany taıaqpen uryp, sodan keıin ony tunshyqtyrýǵa tyrysady. Beınejazbany taspalaǵan áıel jaýyz anaǵa "Anjela jeter endi! Balany jiber. Sen ony tunshyqtyryp jatyrsyń" dep aıqaılaıdy.

"Karagasok aýdanynyń prokýratýrasy kámeletke tolmaǵandardyń qadaǵalaýsyzdyǵy men quqyq buzýshylyǵynyń aldyn alý týraly zańnamanyń oryndalýyn tekserýge kiristi. Tekserý barysynda, aldyn alý júıesiniń ýákiletti organdary men mekemeleri jumysynyń ýaqytylyǵy men tolyqtyǵyna, sondaı-aq olardyń vedomstvoaralyq ózara is-qımyl deńgeıine baǵa beriletin bolady" delingen prokýratýra habarlamasynda.

Qamqorshylyq mamandary otbasyǵa kelip, jaǵdaıdy zerttedi. Oblystyq departament Reseı Federasıasynyń otbasy kodeksiniń 77-babyna sáıkes balanyń qaýipsizdigin qamtamasyz etý úshin ony otbasynan alyp qoıýǵa sheshim qabyldady (balanyń ómirine nemese densaýlyǵyna tikeleı qaýip tóngen jaǵdaıda, qorǵanshylyq jáne qamqorshylyq organy balany ata-anasynan dereý alýǵa quqyly).

Prokýratýra quqyq qorǵaý organdary bastaǵan prosesýaldyq tekserýdi baqylaýǵa aldy. Qazirgi ýaqytta bala qaýipsiz jerde, qamqorshylyq organdary ony otbasyna ornalastyrýdy uıymdastyrý boıynsha jumys júrgizýde.