2020 jyly memleket basshysynyń qaýlysymen Eriktiler jyly dep jarıalanǵan edi.

Ár saladaǵy jaýapty qyzmetkerler eriktiler jylyn óz deńgeıinde ótkizýdi maqsat etti.

Bıyl Qazaqstan halqy úshin ǵana emes, tutas álem jurtshylyǵy úshin aýyr jyl boldy. Jyl basynan beri tutas dúnıeni aıaǵynan tik turǵyzǵan koronavırýs pandemıasy biraz adamdy ábigerge saldy.

Túrkistan oblysynda birneshe aýyldy sý basyp, halyq shyǵynǵa ushyrady. Osyndaı sátte erikti atanyp, artynan óziniń qalaýymen áskerge ketken sarbaz Darhan Náshirbektiń oqıǵasy «Sheshimi bar» baǵdarlamasynyń ujymyn beıjaı qaldyrmaǵan.

«Sheshimi bar» baǵdarlamasynyń shaqyrýymen 6 aı ulyn kórmegen Gúlnazıra Muratova Almatyǵa Túrkistan oblysy, Maqtaral aýdanynan keldi. Stýdıada Gúlnazıra Muratova balasynyń áskerge ne sebepti ózi suranyp barǵanyn aıtyp berdi. Onyń sózinshe, Ózbekstandaǵy Sardoba sý qoımasy jarylǵan kezde Túrkistan oblysynyń birneshe aýylyn sý basady. Tótenshe jaǵdaı kezinde erjetken balasy kórshi aýyldy sý qaýipinen aman alyp qalýy úshin bóget jasap, aýyl turǵyndaryna kómektesedi. Alǵashqy kómekti QR Ulttyq Ulan sarbazdary kórsetkendikten, uly Darhan Náshirbek ulandyqtardyń qatarynda bolýǵa sheshim qabyldap, áskerge ózi suranyp barady. Ákesi de qarsy bolmaı, balasynyń bul oıyn quptaıdy.

«Balasy eline qyzmet etse, ata-ana úshin odan artyq qýanysh joq. Elin-jerin qorǵasyn, ár azmattyń boryshy» degen Gúlnazıra Muratova telearna ujymyna alǵysyn aıtyp, shyǵarmashylyq tabys tiledi.

Qazirgi ýaqytta QR Ulttyq Ulany «Ońtústik» óńirlik qolbasshylyǵynyń №5571 áskerı bóliminiń sarbazy D. Náshirbek áskerde ata-anasynyń, jaqyndarynyń qadirin túsingenin aıtady: «Menen keıingi baýyrlaryma aıtar aqylym – áskerge ár jigit barýy tıis, ony árbir azamat kórýi qajet. Sebebi, ol – Otan aldyndaǵy er-azamattyń eń birinshi boryshy. Áskerde kóp zattyń qadirin túsinesiń. Eń birinshi, ata-ananyń qadirin bilesiń. Mineziń de ózgerip, salmaqty bola túsesiń».

Keler jyly mamyr aıynda áskerı boryshyn aıaqtaıtyn sarbaz aldaǵy josparyn da aıtty. Ol zańger mamandyǵyn oqyp, sol salada eline qyzmet etpek oıy bar.