Densaýlyq saqtaý vıse-mınıstri - bas sanıtar dáriger Erlan Qıasov Ortalyq saılaý komısıasynyń otyrysynda Qazaqstan Respýblıkasy parlamenti májilisi men máslıhat depýtattaryna daýys berý kezinde koronavırýs ınfeksıasynyń taralýynyń aldyn alý jáne sanıtarlyq-epıdemıologıalyq qaýipsizdikti qamtamasyz etý jáne azamattardyń densaýlyǵyn qorǵaý algorıtmi jaıly aıtty.

Algorıtmge saı tómendegideı talaptar qoıylady:

- Árbir saılaý ýchaskesinde kireberiste medısına qyzmetkerleri nemese volonter kezekshilikpen termometr arqyly kelgen azamattardyń temperatýrasyn ólsheýi kerek;

- Qoldy dezınfeksıalaýǵa arnalǵan sanıtaızer bolýy tıis;

- Saılaýshylardyń qozǵalys baǵyty boıynsha araqashyqtyq belgiler men nusqaýlyq bolýǵa tıis;

- Paıdalanylǵan jeke qorǵanys quraldaryn tastaýǵa arnalǵan konteınerler, dene qyzýy kóterilgen (37ºS-tan joǵary) jaǵdaıda adamdardy oqshaýlaýǵa arnalǵan jeke oryn bolýy qajet.

Saılaý komısıalarynyń qyzmetin uıymdastyrý kezinde komısıa músheleri árbir 3 saǵat saıyn maskany aýystyrýǵa tıis, ishke kirgende qoldy tazalaý, al  qol alysýǵa jáne kelýshilermen jaqyn baılanysýǵa bolmaıdy, saılaý komısıasy nysanyn ylǵaldy tazalap, jıhaz ben tehnıkalyq jabdyqty bir-birinen keminde 1,5-2 metr qashyqtyqta ornalastyrý qajet.

Budan basqa, saılaý búletenderin taratqanda tikeleı baılanys ornatýǵa bolmaıdy.

Saılaýshylar jeke basyn kýálandyratyn qujatty saılaý komısıasynyń múshesine kórsetedi, biraq qolyna berilmeıdi.

– Saılaýshylar saılaý ýchaskesine barǵanda medısınalyq maska jáne antıseptıkalyq suıyqtyq qoldanýy kerek. Búletendi alǵan kezde komısıa músheleriniń qolyna bermeıdi, jeke basyn kýálandyratyn qujatty ashyp kórsetýi kerek. Daýys berýge óz qalamyńyzdy ala kelińiz,  bolmaǵan jaǵdaıda saılaý komısıasy bergen qalamdy paıdalanyńyz. Bala ertip kelýge bolmaıdy.

Úıde emdelýine baılanysty oqshaýlaý rejımindegi nemese koronavırýs ınfeksıasyna baılanysty karantınde otyrǵan daýys berýge qatysýshylar saılaý ýchaskesinen tys jerde daýys berý týraly ótinish bildirgen jaǵdaıda saılaý komısıasynyń múshesine habarlaýǵa tıis, – dedi bas sanıtar dáriger.