Densaýlyq saqtaý mınıstri Alekseı Soı koronavırýsqa qarsy vaksınany nelikten saldyrmaǵanyn túsindirdi.

– Reseılik, otandyq vaksınany saldyrmadym. Qazir synaqtyń qorytyndysyn kútip otyrmyz. Qazaqstanda resmı túrde tirkelip, jappaı qoldanysqa engizilgen soń alǵashqylardyń biri bolyp vaksınany saldyramyn. Reseılik vaksına nemese otandyq vaksına ma onda turǵan eshteńe joq. Densaýlyq saqtaý mınıstrligindegi áriptesterdiń jartysy otandyq vaksınany, jartymyz reseılik vaksınany saldyrtamyz. Iaǵnı eki vaksınanyń da qaýipsiz, tıimdi ekenin kórsetý úshin. Biraq biz vaksınanyń resmı tirkeýge alynǵanyn kútip otyrmyz, – dedi ol.

Alekseı Soı basqa mınıstrler men ákimderdiń vaksına saldyryp jatqanyna qatysty pikir bildirdi. 

– Áriptesterimizdiń vaksına saldyryp jatqany jaqsy. Alaıda densaýlyq saqtaý mınıstri vaksına saldyrsa, bul halyqty ekpe egýge shaqyrý bolyp sanalady. Demek, vaksınanyń qaýipsiz ári tıimdi ekeni dáleldengen degen sóz. Soǵan baılanysty biz medısınalyq qyzmetker retinde vaksınanyń kepildengen, anyq nátıjesin kútýimiz qajet. Qazir klınıkalyq synaqtyń birinshi jáne ekinshi fazasynda qaýipsiz ári tıimdi degen qorytyndy shyqty, – dep atap aıtty mınıstr.

Aıta keteıik, budan aldyn Qazaqstannyń bilim jáne ǵylym mınıstri Asqat Aımaǵambetov, Jambyl oblysynyń ákimi Berdibek Saparbaev, prezıdent keńesshisi Erlan Qarın qazaqstandyq vaksınany saldyrǵan bolatyn.