Prezıdent Qasym-Jomart Toqaev premer-mınıstr Asqar Mamındi qabyldady. Bul týraly Aqorda saıty habarlady.

Saıt málimetinshe, Mamın memleket basshysyna 2020 jyldyń qorytyndysy boıynsha el damýynyń makroekonomıkalyq kórsetkishiniń boljamdy esebi men respýblıkadaǵy sanıtarlyq-epıdemıologıalyq ahýal jaıynda baıandady.

Premer-mınıstr prezıdentke 2020 jyly naqty sektordaǵy óndiris kólemi 2 paıyzǵa artqany jaıynda aqparat berdi.

"Óńdeý ónerkásibi 3,3 paıyzǵa, onyń ishinde azyq-túlik óndirisi 3,6 paıyzǵa, farmasevtıka 40 paıyzǵa, daıyn metal ónimderin óndirý 20 paıyzǵa, mashına jasaý 16 paıyzǵa, atap aıtqanda avtomobıl óndirisi 53 paıyzǵa, jeńil ónerkásip 16 paıyzǵa ósken. Solaısha naqty sektor ulttyq ekonomıkanyń turaqtylyǵyn saqtaýdyń basty faktoryna aınalǵan" delingen resmı saıt habarlamasynda.

Asqar Mamın memleket basshysyna uzaq merzimdi orta kórsetkishter boıynsha qurylys salasynyń qarqyny aıtarlyqtaı joǵary ekenin aıtty.

"Byltyr qurylys jumystarynyń kólemi 12,5 paıyzǵa artqan. Paıdalanýǵa berilgen turǵyn úı kólemi 14,5 paıyzǵa kóbeıgen nemese 15 mıllıon sharshy metr baspana tapsyrylǵan. Aýyl sharýashylyǵy salasyndaǵy ósim 5,0 paıyzǵa jetken. Taý-ken óndirisindegi temir keni jáne ózge de paıdaly qazbalar boıynsha ósim saqtaldy.

Qasym-Jomart Toqaevqa elimizdegi sanıtarlyq-epıdemıologıalyq ahýal baqylaýda ekenin baıandaǵan Premer-Mınıstr kúndelikti jańadan indetke shaldyqqandardyń sany 0,46 paıyzǵa óskenin, elimiz boıynsha koronavırýstyń órshý deńgeıiniń kórsetkishi 0,9 paıyzdy quraıtynyn jetkizdi. Juqpaly aýrýlar aýrýhanalarynyń 29 paıyzynda, jansaqtaý bólimderiniń 21 paıyzynda adamdar emdelip jatyr" delingen habarlamada.

Prezıdentke ınvestısıa tartý, halyqty jumyspen qamtý, áleýmettik mańyzy bar taýarlardyń baǵasyn turaqtandyrý jáne basqa da eldiń áleýmettik-ekonomıkalyq damýyndaǵy ózekti máseleler boıynsha qabyldanǵan sharalar jaıynda esep berildi.