«Nur Otan» partıasynyń Respýblıkalyq saılaýaldy shtaby Qaraǵandy oblysyna bardy.

«Arselor Mıttal Temirtaý» metalýrgtarymen jáne «Qazaqmys»-qa qarasty Nurqazǵan ken baıytý kombınaty jumysshylarymen birge bıleýshi partıanyń saılaýaldy baǵdarlamasy aıasynda óńirdi ary qaraı damytý jaıy talqylandy.

Sonymen, taıaýdaǵy 5 jylda oblysta keminde 150 myń jańa jumys ornyn ashý, 2,5 myń km avtojol salý jáne jóndeý, 176 aýyldyń turǵyndaryn sapaly aýyz sýmen qamtamasyz etý jáne basqa da jobalar josparlanyp otyr.

«Ózderińiz biletindeı, birneshe kún buryn Memleket basshysy Qasym-Jomart Toqaev qorshaǵan ortany lastaǵany úshin jaýapkershilikti kúsheıtýdi kózdeıtin jańa Ekologıalyq kodekske qol qoıdy. Ekologıany jaqsartý maqsatynda «Nur Otan» partıasy óńirde 9 qoqys suryptaıtyn keshen salýdy jáne zıandy shyǵaryndylardy keminde 13%-ke azaıta otyryp, ónerkásip kásiporyndaryn jańǵyrtýdy qamtamasyz etýdi mindet etip qoıyp otyr», - dep atap ótti kezdesý barysynda saılaýaldy shtab jetekshisi Baýyrjan Baıbek.

Osy kúni partıa ókilderi ótken jyly ashylǵan «Global City» kóterme-bólý ortalyǵynyń bazasynda shaǵyn jáne orta bıznes ókilderimen kezdesti.

«Elbasy, partıa Lıderi Nursultan Nazarbaevtyń tapsyrmasy boıynsha saılaýaldy ýádelerimiz aıasynda biz salyq sanyn qysqartyp, olardy esepteý tártibin ońtaılandyrýdy, áleýmettik-mańyzdy taýar óndirýshiler úshin QQS-yn tómendetýdi, ekonomıkanyń naqty sektoryn nesıelendirýdi ulǵaıtýǵa jaǵdaı jasaýdy nıet etip otyrmyz», - dedi partıa Tóraǵasynyń birinshi orynbasary.

Bıznesti ruqsatsyz tekserýlerden qorǵaý maqsatynda salyqtyq zań buzýshylyqtar úshin qylmystyq jaýapkershilikke tartý shegin qaıta qaraý josparlanýda. Sot pen prokýrordyń sanksıasynsyz kásipkerlerge qatysty tergeý áreketterin júrgizýge tyıym salynady.

Jalpy, qolaıly ekonomıkalyq orta qurý úshin memlekettiń ekonomıkadaǵy úlesin azaıtý, shaǵyn jáne orta bızneske kedergilerdi joıý mindeti qoıylyp otyr. Jeke bıznes ashý úshin 50 myń azamatqa mıkronesıe beriledi, onyń ishinde jalpy somasy 250 mlrd. teńge 42 myń aýyl turǵynyna usynylady. Sondaı-aq, «Qarapaıym zattar ekonomıkasy» baǵdarlamasy aıasynda halyq tutyný taýarlaryn óndirýshilerge de qoldaý kórsetiledi.