Parlament májilisi saılaýyna qatysqan birneshe belgili tulǵalardyń telefondary sóndirýli tur. Solardyń qatarynda jýrnalıs, "Adal" partıasynyń múshesi Maqsat Tolyqbaı da bar.

Ol ekzıtpol nátıjesi jáne ortalyq saılaý komısıasynyń aldyn ala qorytyndysy shyqqannan keıin áleýmettik jelide birneshe jazba jarıalaǵan.

Aldymen "Biz jeńdik. Erteńgi nátıjeni kúteıik. Málimdeme jasaımyn" dese, artynsha, "Saılaý ádil ótti" degen sózdi qudaıdan uıalmaǵan adam ǵana aıtatyn shyǵar?!" dep jazǵan.

Munan soń "Táýelsiz baqylaýshylardyń protokol nátıjesi endi bitipti. "Adal" partıasy 29 prosent daýyspen ekinshi oryn aldy. Eń kóp daýys bergen Mańǵystaý, Qyzylorda, Túrkistan oblysy" dep habarlaǵan.

Endi mine, ortalyq saılaý komısıasy parlament májilisi saılaýynyń qorytyndy nátıjesin jarıalaǵannan keıin Maqsat Tolyqbaımen baılanysý múmkin bolmaı otyr. Qamshy tilshisi eks-kandıdattan saılaý nátıjesine baılanysty pikiri, endigi jospary týraly suramaq bolyp habarlasqanynda  telefony sóndirýli boldy.

OSK qorytyndysyna sáıkes, "Adal" partıasy májiliske ótýge múmkindik beretin 7 paıyz daýysty jınaı almady.

Sondaı-aq qarjy sarapshysy Dáýlet Muqaev, sportshy Ardaq Nazarov, jýrnalıser Zeıin Álipbek pen Dáýren Qýat sekildi úmitkerlerdiń de telefony sónip tur. Aldyńǵy eki kandıdat "Adal partıasynyń múshesi bolsa, sońǵylary saılaýǵa "Aýyl" partıasynan túsken.