Májilistiń burynǵy depýtaty Marat Dáribekuly Bopazov QazIndustry basqarma tóraǵasynyń orynbasary bolyp taǵaıyndaldy. Bul týraly ındýstrıa jáne ınfraqurylymdyq damý mınıstrliginiń baspasóz qyzmeti habarlady.

"QazIndustry qazaqstandyq ındýstrıa jáne eksport ortalyǵy" AQ dırektorlar keńesiniń sheshimimen "QazIndustry Qazaqstandyq ındýstrıa jáne eksport ortalyǵy" AQ basqarma tóraǵasynyń orynbasary bolyp Marat Dáribekuly Bopazov saılandy" delingen habarlamada.

Ol buǵan deıin parlamenti májilisiniń VI shaqyrylymynyń depýtaty, ekologıa máseleleri jáne tabıǵat paıdalaný komıtetiniń múshesi bolǵan.

"QazIndustry qazaqstandyq ındýstrıa jáne eksport ortalyǵy" AQ-da Marat Bopazov ónerkásiptik damý máselelerine jetekshilik etetin bolady.

Vedomstvo málimetinshe, Marat Bopazov V.I. Lenın atyndaǵy Qazaq polıtehnıkalyq ınstıtýtyn "taý-ken ınjeneri" mamandyǵy boıynsha, sondaı-aq İ. Jansúgirov atyndaǵy Jetisý memlekettik ýnıversıtetin "quqyqtaný" mamandyǵy boıynsha támamdaǵan.

Jalpy jumys ótili 35 jyl.

Ár jyldary Semeı geologıalyq-barlaý tehnıkýmynda, Taldyqorǵandaǵy "Oblvodokanal" basqarmasynda, ulttyq-mádenı uıymdardy qoldaý qorynda jumys istedi. Sondaı-aq Taldyqorǵan qalalyq ákimshiliginiń qurylys jáne turǵyn úı-kommýnaldyq sharýashylyq basqarmasy bastyǵynyń orynbasary, Taldyqorǵan qalasynyń "Komýnalnık" MKK bastyǵy qyzmetterin atqardy.

1999 jyldyń qarashasynan 2016 jyldyń naýryzyna deıin Taldyqorǵan qalalyq máslıhatynyń hatshysy qyzmetin atqardy.