«Nur Otan»-nyń aımaqtyq fılıaldary basshylyǵynda birqatar kadrlyq jańartýlar júrgizildi. Ortalyq apparattyń baspasóz qyzmeti habarlaǵandaı, jańa taǵaıyndaýlar «Nur Otan»-nyń saılaýaldy ýádelerin tıimdi júzege asyrýǵa qatysty partıa lıderi qoıǵan mindetterdi eskere otyryp júrgizildi.

Elbasy, partıa lıderi Nursultan Nazarbaevtyń bıliktiń atqarýshy jáne ókildi organdarynda basshylyqtaǵy áıelderdiń úlesin 30%-ǵa deıin ulǵaıtý týraly tapsyrmasyn oryndaý aıasynda, «Nur Otan»-nyń Almaty oblystyq fılıaly tóraǵasynyń birinshi orynbasary Gúlnar Toılybaeva boldy. Ol partıada 2007 jyldan bastap bólim meńgerýshisinen oblystyq fılıal tóraǵasynyń orynbasaryna deıingi eńbek jolynan ótken.

Sondaı-aq «Nur Otan» partıasynyń Shymkent qalalyq fılıaly tóraǵasynyń birinshi orynbasary bolyp Janar Bektaeva taǵaıyndaldy. Ol 2019 jyldan bastap Shymkent qalasy ákimdiginiń İshki saıasat basqarmasynyń basshysy bolyp jumys istedi.

Memleket basshysy Qasym-Jomart Toqaevtyń belsendi jastarǵa arnalǵan áleýmettik lıft qurý jónindegi tapsyrmasyn iske asyrý aıasynda «Nur Otan»-nyń elordalyq fılıaly tóraǵasynyń birinshi orynbasary bolyp 30 jastaǵy Dáýlet Káribek taǵaıyndaldy. Partıanyń Saıası keńesi Búrosynyń jáne Prezıdenttik jastar kadrlyq rezerviniń múshesi. Sarapshydan bastap «Jas Otan» jastar qanatynyń tóraǵasyna deıingi qyzmettik joldan ótti. Sońǵy jumys orny – Nur-Cultan qalasy Jastar saıasaty máseleleri basqarmasynyń basshysy.

Almatyda partıanyń qalalyq fılıaly tóraǵasynyń birinshi orynbasary 33 jastaǵy Meıirjan Otynshıev boldy. Ál-Farabı atyndaǵy QazUÝ men prezıdenti janyndaǵy Memlekettik basqarý akademıasynyń túlegi. Eńbek jolyn Almaty qalasy Jumyspen qamtý jáne áleýmettik baǵdarlamalar basqarmasynyń mamany bolyp bastaǵan. Sońǵy 2 jylda Almaty qalasy ákimdiginiń Turǵyn úı saıasaty basqarmasy basshysynyń orynbasary bolyp istedi.

Saıası keńestiń aımaqtyq búrosynyń usynýymen partıanyń Jambyl oblystyq fılıaly tóraǵasynyń birinshi orynbasary bolyp Daýyl Beısenqulov taǵaıyndaldy. Ol osy taǵaıyndaýǵa deıin Jambyl oblysy ákimdiginiń İshki saıasat basqarmasyn basqardy.

Partıanyń baspasóz qyzmeti taratqan aqparatqa sáıkes, Erlan Qanalımov (Nur-Sultan), Stanıslav Kankýrov (Almaty), Bahadyr Narymbetov (Shymkent) jáne Janbolat Jórgenbaev (Almaty oblysy) atalǵan óńirler máslıhattarynyń hatshylary bolyp saılandy.

Óz kezeginde Aqmola, Aqtóbe, Almaty, Atyraý, Batys Qazaqstan, Qyzylorda, Mańǵystaý, Pavlodar, Soltústik Qazaqstan jáne Túrkistan oblystyq fılıaldary tóraǵasynyń birinshi orynbasarlary óńirlik máslıhattardaǵy «Nur Otan» fraksıalarynyń basshysy qyzmetin qatar atqarady.

Baspasóz qyzmetinde atap ótkendeı, kadrlarǵa qatysty mundaı sheshim «Nur Otan» partıasynyń aımaqtyq saılaýaldy baǵdarlamalaryn sapaly júzege asyrý jáne saılaýaralyq kezeńde tıisti jumysty uıymdastyrý boıynsha partıa basshylyǵy qoıǵan mindetterge tolyq jaýap beredi.